“Тамир” зочид буудлын урд зөвшөөрөлгүй гарааш барьсан иргэдэд газар чөлөөлөх хугацаатай мэдэгдэл хүргүүллээ

Уурхайчин багийн Тамир зочид буудлын урд Хот төлөвлөлтийн шаардлага хангахгүй барилгажсан хэсгийг дахин төлөвлөн барилгажуулах төслийн байршилд газар чөлөөлөлт хийгдэнэ. 
Аймгийн ИТХ-ын 2021 оны есдүгээр сарын 15-ны өдрийн 05 дугаар тогтоолоор Хот суурин газрыг дахин хөгжүүлэх хуулийн  хүрээнд “Дахин барилгажуулах, дэд бүтэцжүүлэх төсөл”-ийг гурван байршилд баталсан.  

      Тогтоолын хүрээнд хэрэгжиж буй Хот төлөвлөлтийн шаардлага хангахгүй барилгажсан хэсгийг дахин төлөвлөн барилгажуулах төслийн эхний байршил болох Уурхайчин багийн Тамир зочид буудлын урд байрлах 1,3 га талбайд  төсөл хэрэгжүүлэх аж ахуйн нэгж шалгарсан.  Ингэхдээ тус  байршилд  гарааж эзэмшигч 63 иргэнээс "Дахин төлөвлөн барилгажуулах төсөл"-ийн санал хураалт авах үл ажиллагааг өнгөрсөн зургаадугаар сарын 24-нд зохион байгуулж, иргэдийн 80 хувь нь дэмжиж санал өгсөн. 

      Тус байршилд төсөл хэрэгжүүлэгчээр шалгарсан “Таван хан энержи” ХХК нь бичиг баримтын зөрчилгүй иргэдтэй хот суурин газрыг дахин хөгжүүлэх хуулийн дагуу гурван талт гэрээ байгуулж, 112 авто гараашийн газар чөлөөлөлтийг хуулийн дагуу хийнэ.   Харин зөвшөөрөлгүй, бичиг баримтгүй барьсан гараашуудад  газрын тухай хуулийн дагуу газар чөлөөлөлт хийх юм байна. Иймд аймгийн Газрын харилцаа, барилга хот байгуулалтын  газраас зөвшөөрөлгүй гарааш барьсан иргэдэд ирэх сарын 5-ны дотор зөрчлөө арилгаж газар чөлөөлөх мэдэгдлийг хүргүүлжээ.