БШУЯ-ны шийдвэрээр гуравдугаар сургуулийг “Хийморь” төв рүү шилжүүллээ

Эрдэнэт хотын анхны сургуулиудын нэг Ерөнхий боловсролын III сургуулийн хичээлийн нэгдүгээр байрыг буулгаж, спорт заалны хамт 960 хүүхдийн сургууль шинээр барих ажил эхэлсэн. 
Ашиглалтад ороод 40 гаруй жил болсон  тус сургуулийн хана таазнаас нь их хэмжээний ус нэвчиж, дусаал дусаж мөөгөнцөр үүсч, цаашид ашиглах боломжгүй гэх мэргэжлийн байгууллагын 5 удаагийн дүгнэлт 2010-2021 онд гарсан байдаг. 

    2017, 2018 онд тус сургуульд их засвар хийсэн ч сууриараа муудсан барилгыг 2021 онд нураах шийдвэр гаргасан. Ингээд  тендер сонгон шалгаруулалтад Гурван хангай ХХК шалгарч ийн буулгалтын ажлыг эхлүүлээд байна. Энэ онд  сургуулийн барилгыг  буулгах бөгөөд ирэх хавраас барилгын ажлыг эхлүүлэх юм.  Улсын төсвийн хөрөнгө оруулалтаар хийгдэж буй уг ажлын нийт төсөвт өртөг нь 14 тэрбум  бөгөөд БШУЯ дээр батлагдсан төсөв нь 7,8 тэрбум төгрөг. Тус сургуулийн сурагчдыг  “Хийморь" төвд  суралцуулах шийдвэрийг БШУЯ-наас гаргасан.  Сургуулийн барилга ашиглалтад орох хүртэл багадаа хоёр мянган метр квадрат талбай бүхий барилга хэрэгтэй учир салбар яамнаас тус төвийг сонгож, түрээсийн зардлыг  яамнаас олгохоор шийдвэрлэсэн. 
     Тодруулбал, БШУ-ны сайдын 2022 оны 08-р сарын 05-ны өдрийн "Барилгын түрээсийн талаар авах арга хэмжээний тухай" А/277 дугаар тушаалаар түрээсийн байрны зардлыг баталж,  3 дугаар сургуулийг шилжүүлэх “Хийморь” төвийн засварын ажил үргэлжилж байна.