Сууц өмчлөгчдийн холбоодтой уулзаж санал солилцлоо

Хотын захирагчийн албанаас өнөөдөр Сууц өмчлөгчдийн холбоодтой уулзаж  өвөлжилтийн бэлтгэл ажил, тулгамдаж буй бэрхшээл цаашид анхаарах зүйлсийн талаар хэлэлцэж санал солилцлоо.  Орхон аймгийн хэмжээнд  43 СӨХ үйл ажиллагаа явуулдаг.  Уулзалтад мэргэжлийн байгууллагуудын  холбогдох албан тушаалтнууд, багуудын Засаг дарга, Баян-Өндөр сумын төлөөлөл оролцлоо. 

      СӨХ буюу сууц өмчлөгчдийн холбоо нь нийтийн зориулалттай орон сууцны сууц өмчлөгч бүхий гишүүдээс бүрдсэн, тухайн байр болон хотхоны ашиглалтын хэвийн байдлыг хангах, сууц өмчлөгчдийн эрх, ашиг сонирхлыг хамгаалах зорилго бүхий холбоо юм. Өөрөөр хэлбэл, танай байранд 4 ба түүнээс дээш айл оршин суудаг бөгөөд сар бүр цэвэрлэгээ, үйлчилгээний зэрэг наад захын хураамж авдаг бол СӨХ үйл ажиллагаагаа явуулж байна гэсэн үг. 
Өнөөдрийн уулзалтад оролцсон СӨХ-оодын төлөөлөл орцны үйлчлэгч хийх хүн олдохгүй байгаагаас эхлээд  айл өрх төлбөрөө төлөөгүй зэрэг асуудлаас үүдэн зарим СӨХ-ны үйл ажиллагаа доголдох хэмжээнд хүрсэн зэрэг  асуудлыг хөндсөн.  

Уурхайчин багийн Их-Өргөө СӨХ-ны дарга н.Наранцэцэг: Манай СӨХ-нд 3-6,7,8,9,19,20 дугаар байрууд хамаардаг. 1976, 1977 онд баригдсан барилгууд. Сантехник тэр дундаа бохирын шугам их муудсан. СӨХ өөрсдийн боломж нөөцөөр их бага засварыг хийгээд явдаг ч дорвитой болж өгөхгүй байна.  Хорхой шавж үүрлэж байгаа нь ч бохирын шугам муудсантай холбоотой. Тиймээс мэргэжлийн байгууллагууд үзэж шалгаад засварлаж, шинэчлэх шаардлагатай байна гэх саналыг хэлсэн.  Мөн  тэрээр дээвэр, заадас нөхөх ажлыг гүйцэтгэсэн зарим компаниуд их чанаргүй хийсэн. 2020 онд 3-19 дүгээр байрны хоёр дахь  блок байрны дээврийн засварыг “Орхон нүнжиг” ХХК чанаргүй, сэтгэлгүй хийснээс болж өнөөдөр айлууд руу ус орж байна гэсэн. 

     Харин үүнд Хотын Захирагчийн албаны дарга С.Ганцогт  ирэх долоо хоногт СӨХ, оршин суугчдын төлөөллийн хамтаар мөн ажил гүйцэтгэсэн “Орхон нүнжиг” ХХК-ийн  холбогдох албан тушаалын хүнийг байлцуулан гүйцэтгэсэн ажилтай нь танилцаж, дахин хийлгүүлэх шаардлагыг тавина.  Гүйцэтгэсэн ажллаа чанаргүй хийсэн аж ахуйн нэгжүүдтэй цаашид хамтран ажиллахгүй.  2009-2011 онд  СӨХ-оод өөрсдийн нөөц боломжоор дээврийн засварын ажил гүйцэтгэсэн. Тэдгээр  байрнуудын дээврийг төр нэг удаа засвар хийнэ. 2012 оноос хойш чанаргүй засвар хийсэн аж ахуйн нэгж компаниудаар өөрсдөөр нь дахин гүйцэтгүүлнэ гэсэн.

      Бохирын шугамтай холбоотой асуудалд ажлын хэсэг гарган "Эрдэнэт Ус ДТС" ОНӨХК-ийнхантай хамтарсан үзлэгийг ирэх долоо хоногт орон сууцны хорооллуудад хийхээр боллоо.  
Мөн тэд гадна талбайн үйлчлэгч нэн хэрэгцээтэй байгаа талаар хэлсэн. Хот тохижуулах газрын нэг үйлчлэгчид 12 мянган метр квадрат талбай ногддог. Шинээр байшин хороолол нэмэгдэх бүрд гадна талбайн үйчлэгчийн хэрэгцээ шаардлага  бий болж байгаа. Тиймээс ирэх оны нэгдүгээр сараас Хот тохижуулах газрын гадна талбайн үйлчлэгчийн орон тоог нэмэгдүүлэхэд анхаархаа Хотын захирагчийн албаны С.Ганцогт дарга хэлсэн. 

 Уулзалтаар СӨХ өөрийн санхүүжилтээр хийж хэрэгжүүлж байгаа ажил, үйлчилгээгээ оршин суугчдад нээлттэй ил тод танилцуулах, орлого, зарлагаа бодитоор  танилцуулах,  хортон шавж устгахтай холбоотой ямар төрлийн ямар материал бодис хэрэгтэй байгаа судалгаа тооцоогоо танилцуулахыг даалгалаа.