Хувийн туслах үйлчилгээ үзүүлэх туршилтын төсөл хэрэгжиж байна

 Орхон аймгийн Засаг даргын Тамгын газар, “Хүмүүн бие даан амьдрах төв”-тэй хамтран “хувийн туслах үйлчилгээ” туршилтын төслийг өнгөрөгч 5-р сараас хэрэгжүүлж эхэлсэн. Өнөөдөр уг төслийг танилцуулах өдөрлөг А.Амарын талбайд зохион байгуулагдлаа. 
         Манай аймгийн хэмжээнд 4000 гаран хөгжлийн бэрхшээлтэй иргэн байдгаас хүнд хэлбэрийн байнгын асаргаанд байдаг 400 гаран хүн байдаг. Туршилтын төслийн хүрээнд хувийн туслах авч нийгмийн харилцаанд орж, өөрийгөө хөгжүүлэх хүсэл сонирхолтой 15 иргэнийг сонгон хамруулна. 
        Мөн 30 туслах ажилтан сонгон шалгаруулж ажиллуулах юм. Ингэхдээ хөгжлийн бэрхшээлтэй иргэнийг бие даан амьдрахад нь дэмжлэг үзүүлэх ур чадвар бүхий, асаргаа үйлчилгээ туслахын 3 хоногийн сургалтад хамруулж байгаа юм. Эдгээр хувийн туслах үйлчилгээ үзүүлэх иргэдийн сургалт мэдээллийн асуудал, цалин хөлс, нийгмийн даатгалын шимтгэлийн зардлыг орон нутгаас шийдвэрлэнэ. Үүнд 65 сая төгрөг зарцуулагдах ажээ. 
          Одоогийн байдлаар 11 ХБИ хамрагдаж, 22 хувийн туслах ажилтан ажиллаж байна. уг төсөл ирэх 12-р сард ажлаа дүгнэж амжилттай хэрэгжсэн тохиолдолд төслийн хүрээгээ өргөжүүлж цааш үргэлжлүүлэн хэрэгжүүлнэ гэдгийг хэлж байна.