ҮНДЭСНИЙ СПОРТЫН VII НААДАМД ОРХОН АЙМГИЙН БАГ ТАМИРЧИД ТҮРҮҮЛЖ, ӨМНӨХ АМЖИЛТАА БАТАТГАЛАА

Энэ сарын 10-13-ны хооронд Хүй долоон худагийн дэнж дээр Үндэсний спортын VII дугаар  их наадам өргөн дэлгэр болж өндөрлөсөн.  Тус наадамд 21 аймаг, нийслэлийн 9 дүүргийн нийт 1700 тамирчин нум сум харваа, шагай харваа, бөх зэрэг ардын уламжлалт  13 спортын төрөлд хурд хүч авхаалж самбаагаа сорин өрсөлдөв. 
Үндэсний спортын VII дугаар  их наадамд  Орхон аймгаас оролцох  баг тамирчдыг Засаг даргын орлогч А.Түвшинжаргал ахлан, 66 тамирчин, дасгалжуулагч, албаны ажилчдын нийт 91 хүний бүрэлдэхүүнтэй амжилттай оролцож,  дөрвөн алт, дөрвөн мөнгө, нэг хүрэл медалийг хүртэж багийн дүнгээр  "АЛТАН МЕДАЛЬ, ЦОМ"-ын эзэд боллоо. 2018 онд зохион байгуулагдсан   Үндэсний спортын VI наадамд Орхон аймаг   тэргүүн байр эзэлсэн  амжилтаа дахин   бататгалаа. 

"Үндэсний спортын VII-дугаар наадам"-д:
• Үндэсний бөхийн сумын цолтой бөхчүүдийн барилдаанд Орхон аймгийн тамирчин сумын заан А.Пүрэвсүрэн түрүүлж, залуу бөхчүүдийн барилдаанд Б.Цэрэндаш үзүүрлэв.
• Мөн Сурын харвааны багийн төрөлд Монгол Улсын гавьяат тамирчин, дархан мэргэн Ш.Даваахүү ахлагчтай  баг үндэсний сурын багийн алтан медаль,
• Уламжлалт Цуваа харваанд даяар дуурсах мэргэн Л.Отгонбаяр алт, Урианхай сур харвааны багийн төрөлд спортын мастер Э.Ганчулуун ахлагчтай баг мөнгөн медаль,
• Уламжлалт сурын төрөлд даяар дуурсах мэргэн Л. Отгонбаяр ахлагчтай баг мөнгө, үндэсний сурын цуваа харваанд гоц мэргэн н.Мөнх-Амгалан мөнгөн медаль,
• Холч харваанд мэргэн н.Ойнбаяр хүрэл медалийн эзэн болсон бол "Эмнэг булгиулагч"-ийн төрөлд Б.Пүрэвсүрэн 4-р байранд шалгарсан юм. Б.Пүрэвсүрэн нь 2018 оны Үндэсний спортын VI дугаар наадмаас алтан медаль хүртэж байсан бол  энэ жилийн наадмаар "МОНГОЛ УЛСЫН АВАРГА АДУУЧИН" цол тэмдгээр шагнагдлаа.
"Үндэсний спортын их наадам"-д багийн нийлбэр амжилтаар 6 аймгийг шагналт байр эзлүүлж, нийслэлийн шилдэг гурван дүүргийн алт, мөнгө, хүрэл медалиар шагнасан юм.