АЙМГИЙН НИЙТИЙН ТЭЭВЭР ИРЭХ САРААС ЦАХИМ ТӨЛБӨРИЙН СИСТЕМД БҮРЭН ШИЛЖИНЭ

 “Цахим Эрдэнэт” хөтөлбөрийн хүрээнд Улаанбаатар хотын “СИМ” ХХК өөрийн санхүүжилт, техник, технологийн шийдлээр Эрдэнэт хотын  нийтийн тээврийн үйлчилгээг цахимжуулах “EPASS” төслийг  өнгөрсөн оны арванхоёрдугаар сараас эхлүүлж  дуусах шадандаа ороод байна.   Өнөөдөр төслийн баг хамт олон Согоот багийн 6.1-ийн автобусны буудал дээр иргэдэд мэдээлэл өгөх  өдөрлөгийг зохион байгууллаа. 
“СИМ” ХХК 590 орчим сая төгрөгийн өөрийн хөрөнгөөр уг төслийг хэрэгжүүлж байгаа бөгөөд Эрдэнэт хот дотор үйлчилгээнд явдаг 40 автобусанд карт унших төхөөрөмж, дэлгэц суурилуулжээ.  
      Мөн 20 автобусны буудал дээр мэдээлэх самбар байршуулсан бол одоо хяналтын камер суурилуулах ажил үлдсэн  байна.  
Эрдэнэт хотын нийтийн тээврийг цахимжуулах ЕPASS төслийн зорилго нь  нийтийн тээврийн үйлчилгээнд технологид суурилсан төлбөр, тооцооний системийг нэвтрүүлэх, иргэдэд нийтийн тээврийн үйлчилгээг хурдан шуурхай, хүртээмжтэй болон соёлтой үйлчилгээг хүргэх юм. 

     Өндөр настан, хөгжлийн бэрхшээлтэй иргэд үнэ төлбөргүй зорчих бөгөөд эхний ээлжинд 5000 цахим картыг ХХҮГ-тай хамтран багуудаар тараах ажлыг зохион байгуулж байгаа аж.  Дээрх иргэдэд цахим төлбөрийн картыг нэг удаа үнэгүй олгох бөгөөд хаяж, үрэгдүүлсэн тохиолдолд 3000 төгрөгөөр худалдан авах юм байна. ЕPASS  картыг хэрхэн ашиглах,  хэрхэн цэнэглэх,  хэрхэн авах мэдээллийг хүргэе. 

КАРТЫГ ХЭРХЭН АШИГЛАХ ВЭ?

• Нийтийн тээвэрт зорчих үед зорчигч та цахим төлбөрийн хүүхэд, хөнгөлөлттэй, энгийн гэсэн гурван төлийн картнаас сонгон орох хаалганы хажууд байрлах карт уншигч төхөөрөмжид ойртуулан  уншуулна. Зорчигч та нийтийн тээврийн автобуснаас буух үедээ карт уншуулах шаардлагагүй. 

КАРТНЫ ТӨРӨЛ 

• Энгийн карт
• Хүүхдийн картаар ЕБС-ийн сурагчид хөнгөлөлттэйгөөр зорчино. 
• Хөнгөлөлттэй зорчих картаар оюутан, цагдаа, өндөр настан болон хөгжлийн бэрхшээлтэй иргэд зорчино. 

КАРТ ХЭРХЭН АВАХ ВЭ? 

• Энгийн картыг зорчигч та автобусны буудал дээр байршсан зарлан мэдээлэх самбарын баруун талд байрлах QR кодыг бүх төрлийн интернет банкны аппликейшн  ашиглан уншуулж гүйлгээ хийснээр таны карт автоматаар гарч ирэх болно. 
• Хүүхдийн картыг зорчигч та сурагчийн үнэмлэх эсвэл ЕБС-ийн сурагч мөн гэсэн батлах бичиг авч ирэх EPASS-ын гэрээт цэгүүдэд хандан авна. 
  Мөн өөрийн  харьяа сургуулиас хувийн бичиг баримтаа үзүүлэн авах боломжтой юм байна. 

КАРТ ХЭРХЭН ЦЭНЭГЛЭХ ВЭ?

• Картны ард байрлах  QR   кодыг бүх төрлийн интернет банкны аппликейшн ашиглан  уншуулан зорчигч та өөрийн дурын мөнгөн дүнгээр цэнэглэлт хийж, гүйлгээний утган дээр картны дугаарыг заавал бичнэ. Хэрвээ танд интернет банкны аппликейшн байхгүй бол Хаан банкны мобайл үйлчилгг ашиглаж “СИМ” ХХК-ны Хаан банкны данс болох 5041410945 дансанд өөрийн дурын мөнгөн дүнгээр цэнэглэлт хийж, гүйлгээний утган дээр заавал картын дугаарыг бичнэ. 
• Та карт борлуулах болон цэнэглэх цэг ЕPASS  хаяг бүхий автобусны буудлын ойролцоо гэрээт цэгүүдэд хандан цэнэглэлт хийх боломжтой.