Хог хаягдал ангилан ялгах үйлдвэр барих төслийн явцтай танилцлаа

Монгол, Польш хоёр  улсын Засгийн газар хоорондын хэлэлцээрийн дагуу Орхон аймагт хатуу хог хаягдал боловсруулах үйлдвэр барих гэрээг 2019 онд үзэглэсэн. Хог боловсруулах үйлдвэрийн барилга угсралт болон бусад ажлын гүйцэтгэгчийг шалгаруулах тендерийг Сангийн яамнаас зохион байгуулж Польшийн “Мэлиорекс” компани шалгарсан ч дэлхий нийтийг хамарсан коронавирус цар тахалтай холбоотойгоор бүтээн байгуулалтын ажил эхлэлгүй багагүй хугацаанд хойшлоод байсан билээ.  
      Өнгөрсөн  тавдугаар сараас эхэлсэн уг төслийн явцтай Засаг даргын орлогч А.Түвшинжаргалаар ахлуулсан ажлын хэсэг өнөөдөр танилцлаа.  Баян-Өндөр сумын Говил багийн нутаг дэвсгэрт байх Хог хаягдлын нэгдсэн цэг дээр баригдаж буй уг үйлдвэрийг энэ  онд ашиглалтад оруулахаар зорьж байгаа юм. Уг үйлдвэр ашиглалтад орсноор аймгийн хэмжээнд гарах хог хаягдлыг ангилан ялгаж  нийслэл хот руу боловсруулах үйлдвэрүүдэд нийлүүлэхэд бэлтгэх юм. 

     “Мэлиорекс” компанийн туслан гүйцэтгэгчээр ажиллаж байгаа орон нутгийн “СОКОЛЬ” ХХК-ийн удирдлагууд ч мөн адил заасан хугацаанд ажлаа хүлээлгэж өгөхөөр зорьж байгаагаа илэрхийллээ. Польш Улсын Засгийн газраас 9 сая еврогийн хөнгөлөлттэй зээлээр хэрэгжиж буй энэхүү төслийн үр дүнд Хог хаягдал боловсруулах үйлдвэр байгуулахаас гадна хог дарж устгах ландфиллийн талбайг хөгжүүлэх, хог хаягдал татан зайлуулах тоног төхөөрөмж нийлүүлж, түлхүүр гардуулах нөхцөлтэй юм. 
        Тодруулбал, төслийн хүрээнд бульдозер, хог ачиж тээвэрлэх ковш гэх мэт 12 төрлийн техник хэрэгсэл нийлүүлэгдсэнээр  Орхон аймгийн Хот тохижуулах газарт парк шинэчлэлт хийгдэнэ. Өнөөдрийн байдлаар техник хэрэгсэл, тоног төхөөрөмжүүд гааль дээр ирсэн гэх мэдээллийг өгч байна. 
Орхон аймаг “Хог хаягдлын менежментийг сайжуулах” хөтөлбөрийг хэрэгжүүлж буй.  Уг хөтөлбөрийн хүрээнд хог хаягдлын менежментийг сайжруулах, хог хаягдлыг эдийн засгийн эргэлтэд оруулах, газрын хөрсөн дээрх хог хаягдлыг 30-50 хувь бууруулах зорилт тавин ажиллаж байна. 

Мэдээллийн төв