Соёлын яамнаас “Нүүдэлчин Монгол-2022” Соёлын биет бус өвийн фестивалийг нийслэл, 21 аймгийн дунд ирэх сарын 12-14-ний өдрүүдэд зохион байгуулна

Соёлын яам, Засгийн газрын хэрэгжүүлэгч агентлаг Соёл, урлагийн газар хамтран соёлын биет бус өвийн долоон ай  савын 362 өвийн төрөл зүйлийн хүрээнд  Соёлын биет бус өвийн фестивалийг ирэх сарын 12-14-ны өдрүүдэд “Горхи-Тэрэлжийн байгалийн цогцолборт газар”-т зохион байгуулахаар нийслэл,  21 аймагт удирдамж хүргүүлсэн.

Орхон аймаг уг арга хэмжээнд оролцохоо илэрхийлж, Засаг даргын захирамжаар Засаг даргын  орлогч А.Түвшинжаргалаар ахлуулсан ажлын хэсэг өнөөдөр анхны хуралдаанаа хийлээ.  
Соёлын биет бус өвийн их наадмаар 21 аймаг, нийслэлийн шилдэг өвлөн уламжлагч нарын зан үйлийн үзүүлбэр, язгуур урлагийн тоглолт, гар урлалын үзэсгэлэн, соёлын биет бус өвийг таниулан сурталчлах арга хэмжээ, уралдаан, тэмцээн, соёлын бүтээлч үйлдвэрлэл, үзэсгэлэн худалдаа, орон нутгийн онцлогийг харуулсан уламжлалт хоол хүнс, идээ ундааны фестиваль, шилдэг өвлөн уламжлагч болон нүүдэлчдийн хүүхдийн тоглолт зэрэг олон талт үйл ажиллагаа зохион байгуулах юм.  

       Тодруулбал, долоон төрөл зүйлийн нэг нь “Эх хал аман уламжлал” байх бөгөөд үүнд Бараг аман аялгуу, Баяд аман аялгуу, Дархад аман аялгуу гэх мэт 22 нэр төрлийн аман аялгууг багтааж, өв тээгч ардын авьяастнууд аль нэг төрлөөр нь сонгож оролцоно. Мөн ардын язгуур урлагт л гэхэд цуур хөгжим, Баяд бий биелгээ гэх мэт 14 төрөл зүйлийг тусгажээ.  
Ажлын хэсгийн ахлагч, Засаг даргын орлогч А.Түвшинжаргал ажлын хэсэгт орсон гишүүдийг бэлтгэл ажлыг хариуцлагатай сайтар хангахыг сануулж, өв тээгч ардын авьяастнуудыг өргөнөөр оролцуулахыг үүрэг өглөө. Ингэхдээ  цахим болон олон нийтийн мэдээллийн хэрэгслээр  сонгон шалгаруулалтын зар түгээж,  сонирхсон өв тээгч, авьяастнуудыг өргөнөөр оролцуулж  ирэх сарын 1-нд сонгон шалгаруулалтыг зохион байгуулахаах тогтов.

       “Алсын хараа-2050” Монгол Улсын урт хугацааны хөгжлийн бодлогод “Үндэсний оюун санаа, өв соёл, сэтгэлгээнд тулгуурласан бүтээгч монгол хүн төвтэй нүүдлийн соёл иргэншлийг хадгалсан тэргүүлэх улс болно”,  Засгийн газрын 2020-2024 оны үйл ажиллагааны хөтөлбөрт “Соёлын өвийг дэлхий дахинд сурталчлах чиглэлээр олон улсын арга хэмжээг зохион байгуулна”, “Байгаль, түүх, соёлын аялал жуулчлалын эвент арга хэмжээнүүдийг тогтмол зохион байгуулж, цар хүрээг өргөжүүлнэ” гэж тус тус заасан байдаг.

        Мөн “Соёлын өвийг  хамгаалах тухай хууль”-д соёлын биет бус өвийг хадгалж хамгаалах, түүнийг өвлөн уламжлагчийг тодруулах, алдаршуулах, авьяас билгийг хөгжүүлэх, олон нийтэд сурталчлан, түгээн дэлгэрүүлэх зорилгоор гурван жил тутам улсын хэмжээнд соёлын биет бус өвийн их наадмыг зохион байгуулж байхаар заасан. 
Тиймээс соёлын салбарын хөгжлийн бодлогод туссан зорилт арга хэмжээ, хуулийн хэрэгжилтийг хангах зорилгоор “Нүүдэлчин Монгол - 2022” соёлын биет бус өвийн их наадмыг  зохион байгуулж байгаа юм. 
         Соёлын биет бус өв нь аливаа үндэстэн, угсаатны бүлэг, хамт олны оршин тогтнох, сэтгэн бүтээж туурвих, амьдран хөгжих эх ундарга билээ. Хүмүүний амьдралын өвөрмөц төрх, зан үйл, хөгжил дэвшлийнх нь нэгэн илэрхийлэл бөгөөд өргөн утгаараа тухайн улс, үндэстний соёл иргэншлийн аюулгүй байдалд  шууд нөлөөлж байдаг чухал хүчин зүйл юм. Иймд соёлын биет бус өвийг хадгалж хамгаалах асуудал хүн төрөлхтний нэн тулгамдсан зорилтын нэг болж, дэлхий нийтийн анхаарлын төвд байсаар байна.
 “Соёлын биет бус өв” гэж хамт олон, бүлэг, хувь хүн соёлын өвийнхөө бүрэлдэхүүн хэсэг гэж хүлээн зөвшөөрсөн зан заншил, дүрслэх болон илэрхийлэх хэлбэр, уламжлалт мэдлэг, арга барил, тэдгээртэй холбоотой эд өлгийн зүйл, зэмсэг, урлагийн бүтээл, соёлын орон зайг” ойлгоно хэмээн “Соёлын өвийг хамгаалах тухай хууль”-д тодорхойлсон байдаг.