Уурхайчин багийн Тамир зочид буудлын урд байрлах 1,3 га талбайд “Эрдэнэт палас” төсөл хэрэгжүүлэх ААН-д батламжийг нь гардууллаа

Аймгийн ИТХ-ын 2021 оны 9 дүгээр сарын 15-ны өдрийн 05 дугаар тогтоолоор Хот суурин газрыг дахин хөгжүүлэх хуулийн  хүрээнд “Дахин барилгажуулах, дэд бүтэцжүүлэх төсөл”-ийг гурван байршилд баталсны нэг нь   Уурхайчин багийн Тамир зочид буудлын урд байрлах  хот төлөвлөлтийн шаардлага хангахгүй  барилгажсан 1,3 га талбай юм.  
    Тус байршилд төсөл хэрэгжүүжлэгчийг сонгон шалгаруулах үнэлгээний хороог 2022 оны 3 дугаар сары 18-ны А/174 дугаар захирамжаар байгуулж, төсөл хэрэгжүүлэгчийг сонгон шалгаруулах зарлалыг  4 дүгээр сарын 18-наас нэг сарын хугацаанд орон нутгийн хэвлэл мэдээллийн хэрэгсэл болон Улаанбаатар хотын дахин төлөвлөлтийн агентлагийн сайтад  байршуулсан.  Уг төсөлд оролцохоор гурван компаниа материал ирүүлснээс “Таванхан энержи” ХХК эхний шатны шаардлага хангаж, Хот суурин газрын дахин хөгжүүлэх тухай хуулийн дагуу 6 дугаар сарын 6-наас 20-ны өдөр хүртэл гараж эзэмшигч иргэдэд танилцуулж, өнгөрсөн сарын 24-ны өдөр санал хураалтыг зохион байгуулсан.  Санал хураалтад тус хэсэгт гараж эзэмшигч 62 иргэнээс 51 иргэн оролцож, 85,9 хувийн саналаар төслийг дэмжсэн. 

     Иймд Хот суурин газрыг дахин хөгжүүлэх тухай хууль, Барилга хот байгуулалтын сайдын 22020 оны 74 дүгээр тушаалаар батлагдсан хот төлөвлөлтийн шаардлага хангахгүй барилгажсан хэсгийг дахин төлөвлөн барилгажуулах үйл ажиллагааны журмын 4 дүгээр зүйлийн 4.8-д зааснаар гараж эзэмшигчдийн 80-аас доошгүй хувийн санал авсан тохиолдолд Засаг даргын захирамжаар төсөл хэрэгжүүлэгчид гэрээ байгуулах эрх олгож батламжилна гэж заасныг үндэслэн гэрээ байгуулах эрх олгох тухай Засаг даргын заргын захирамж болон батламжийг  Засаг дарга С.Батжаргал  төсөл хэрэгжүүлэгч “Таванхан энержи” ХХК-ийн захирал Л.Чадраабалд гардууллаа.  

       Уг байршилд “Таван хан энержи” ХХК, “ABES гранд” ХХК, “Энержи конвертер” ХХК-иуд түншиж 16 давхар орон сууц, үйлчилгээний зориулалттай “Эрдэнэт Палас” төслийг хэрэгжүүлэх юм. 

Засаг дарга С.Батжаргал “Хувийн хэвшлүүд гүйцэтгэл сайтай хариуцлагатай ажиллах ёстой. Төр хувийн хэвшил түншиж буй бүтээн байгуулалт юм. Цаг хугацаандаа ажлаа чанартай гүйцэтгэж хүлээлгэж  өгнө гэдэгт итгэж байна” гэлээ. 
   Төсөл хэрэгжүүлэгч “Таванхан энержи” ХХК-ийн захирал Л.Чадраабал “Тухайн хэсэгт гараж  эзэмшигч иргэдтэй   өөрийн биеэр уулзаж санал солилцож, хэлцэл хийсэн. Гараж эзэмшигч иргэд “Эрдэнэт палас” төсөл хэрэгжүүлэхийг маш сайхан хүлээн авч, дэмжсэн. Энэ ажил цааш үргэлжлээд явах болсонд баяртай байна. Эрдэнэт хот дахин төлөвлөлтийн бүтээн байгуулалтыг эрчимтэй эхлүүлсэн. Үүнд оролцож байгаа нь компаниудын хувьд томоохон дэмжлэг юм. Төр хувийн хэвшлийн түншлэл дээр гурван компани нэгдэж орж байгаа учир тухайн хэсэгт орон сууц, үйлчилгээ, оффисийн чиглэлээр шинэлэг өнгө төрх бүхий , чанартай бүтээн байгуулалтыг  цаг хугацаанд нь гүйцэтгэж  хүлээлгэж өгнө” гэлээ.