Хагас жилийн байдлаар Засаг даргын шуурхайн үүрэг даалгаврын биелэлт 95.3 хувьтай хэрэгжжээ

Энэ оны эхний хагас жилийн байдлаар аймгийн Засаг даргын шуурхай зөвлөгөөн нийт 26 удаа хуралдаж 207 үүрэг даалгавар өгсөн байна. Үүрэг даалгаврын хэрэгжилт 95.3 хувьтай хэрэгжиж байна гэж аймгийн ЗДТГ-ын Хяналт шинжилгээ, үнэлгээ дотоод аудитын хэлтсээс мэдээллээ. 
Хагас жилийн байдлаар хамгийн олон удаа давтагдаж өгөгдсөн үүрэг даалгавраас дурьдвал: 

• Жаргалант сумын Дулааны станцын боловсон хүчний асуудалд онцгой анхаарах тухай 5 удаа.
• Тендерийн ажлуудыг шуурхайлах тал дээр онцгой анхаарах тухай 3 удаа. 
• Орон нутгийн төсвийн тодотголын асуудалд анхаарч бэлтгэл хангах тухай 3 удаа.
• Хөрөнгө оруулалт, бүтээн байгуулалтын ажлын гүйцэтгэлийн хяналтыг сайжруулах тухай 3 удаа.
• Ойр орчмын эзэнгүй дүүргийн хог хаягдал болон сэг зэм устгах, ариутгах ажлыг зохион байгуулах тухай 3 удаа.
• Хотын болон гэр хорооллын гудамж талбайн гэрэлтүүлгийн асуудалд онцгой анхаарч асалтыг нэмэгдүүлэх арга хэмжээ авч ажиллах. Мөн хувийн хэвшлээр энэ ажлыг гүйцэтгэх боломжтой эсэх талаар судалгаа хийж танилцуулах тухай 2 удаа.
• Иргэдээс ирүүлж буй санал хүсэлтийн дагуу “ЭУДТС” ОНӨХК-ийн хэрэглэгчдийн дуудлага хүлээн авах тусгай дугаарын утсыг тогтмол ажиллуулах, дуудлага бүрийг авч байх тал дээр онцгой анхаарч шинэ түвшинд зохион байгуулж ажиллах. Ажилтан, албан хаагчдын харилцаа хандлага дээр онцгой анхаарч ажлын зөв зохион байгуулалт хийж, мэдээ мэдээллийг ойлгомжтой байдлаар иргэдэд хүргэж байх тал дээр ахиц гаргаж ажиллах тухай 2 удаа.
• 2022 онд хийгдэх хөрөнгө оруулалт бүтээн байгуулалтын ажилд онцгой анхаарч ажиллах тухай 2 удаа.
• Хотын ногоон байгууламж болон авто зам өргөтгөх газруудыг хамгаалалтад авах тухай санал танилцуулж холбогдох шийдвэрийг гаргуулах тухай 2 удаа.
• Засаг даргын захирамж гаргаж зөвшөөрөлгүй баригдаж байгаа өргөтгөлийн ажил, орон сууцны байрнуудын даацын хана нурааж байгаа болон явган хүний зам, нийтийн эзэмшлийн зам талбайд дур мэдэн барилга байгууламж, өргөтгөж хашаа барьсан газруудын зөрчлийг арилгах арга хэмжээ авч ажиллах тухай 2 удаа.
• Иргэдээс гарч буй саналын дагуу "Хөх Монгол" цогцолборын хашааг буулгах эсэх ногоон байгууламжийг нэмэгдүүлэх, нээлттэй болгох чиглэлээр тооцоо судалгааг танилцуулах тухай 2 удаа. 
• А1001, А1002 авто зам болон хотын замуудад үзлэг хийж нөхөх ажлыг яаралтай хийж эхлэх. Мөн авто замын хөвөөг янзлах тухай 2 удаагийн үүрэг даалгавар тус тус өгөгдсөн байна.