“Эх хүүхдэд ээлтэй Эрүүл мэндийн төв” шалгаруулах болзолт уралдааны тэргүүн байрыг “Мөнхсүндрэл” ӨМТ эзэллээ

Аймгийн ЗДТГ, Эрүүл мэндийн газартай хамтран 10 шалгуур үзүүлэлтээр гурван сарын хугацаатай “Эх хүүхдэд ээлтэй Эрүүл мэндийн төв”  болзолт уралдааныг өнгөрсөн хоёрдугаар сарын 25-наас  тавдугаар сарын 25-ныг хүртэл гурван сарын хугацаатай зарласан. 

    “Үйлсбадрах”,  “Мөнхийн гэгээ”, “Мөнхсүндрэл”, “Учралтбаяр”, “Анхны-Оч” зэрэг өрхийн эрүүл мэдийн төвүүд уг болзолт уралдаанд оролцсон үйл  ажиллагааны тайланг ЭМГ-т ирүүлсний дагуу үнэлгээний баг үнэлгээ хийж, 10 шалгуур үзүүлэлт, эх хүүхдэд ээлтэй байдлыг газар дээр нь үнэлэн шалгаруулалт хийсэн байна.  Ингэхэд 63 оноогоор “Мөнхсүндрэл”, 56 оноогоор “Үйлсбадрах”, 53 оноогоор “Мөнхийн гэгээ” өрхийн эрүүл мэндийн төвүүд эхний гурван байрыг эзэлж, нэгдүгээр байр 2 сая төгрөг,  хоёрдугаар байр 1.5 сая төгрөг, гуравдугаар байр 1 сая төгрөгөөр шагнууллаа. 
        Шагналыг аймгийн Засаг даргын орлогч А.Түвшинжаргал, ЗДТГ-ын дарга Д.Соёлчхүү нар өнөөдөр гардуулав.
Монгол Улсын Тогтвортой хөгжлийн зорилт, Засгийн газрын 2020-2024 оны үйл ажиллагааны хөтөлбөрийн 2.1.3 дахь заалт Эрүүл мэндийн сайдын 2021 оны 60 дугаар тушаалаар батлагдсан “Эх хүүхэд нөхөн үржихүйн эрүүл мэнд” арга хэмжээний төлөвлөгөөний хэрэгжилтийг хангах хүрээнд эх  хүүхдэд ээлтэй цогц орчинд тусламж үйлчилгээ үзүүлэх нөхцлийг бүрдүүлэх, эрсдэлт хүчин зүйл болон сэргийлж болох өвчлөл эндэгдлийг бууруулах зорилгоор уг  болзолт уралдааныг зохион байгуулсан. 

Болзолт уралдааныг зохион байгуулснаар...

• Эх хүүхдийн эрүүл мэндийн үзүүлэлт өнгөрсөн оны мөн үетэй харьцуулахад амьгүй,гэрийн төрөлт, 5 хүртэл насны хүүхдийн эндэгдлийн тохиолдлын тоо буурч, жирэмсний эрт үеийн хяналт, хяналтанд 6-8 удаа үзүүлсэн давтамжийн хувь, гэр бүл төлөвлөлтөнд хамруулсан хувь нэмэгдэж, эерэг үр дүн гарсан, 
• ӨЭМТ-ийн эх хүүхдэд үзүүлэх тусламж үйлчилгээний зохион байгуулалт, нэг цэгийн урсгал зохицуулалтад ахиц гарч, эх хүүхдэд ээлтэй тусламж үйлчилгээг үзүүлэх өрөө, багаж тоног төхөөрөмжийн хангалт сайжирч 100 хувьд  хүрсэн.
•  Тус аяны хугацаанд эх хүүхдэд ээлтэй байдлаар тохижуулах зардалд "Үйлсбадрах"-2,3 сая, "Мөнхсүндрэл"-2, 9 сая, "Мөнхийн гэгээ"-6,2 сая нийт 11,4 сая төгрөгийн зардлыг зарцуулжээ.
• Эх хүүхдэд тусламж үйчлчилгээ үзүүлэх хүний нөөцийн хангалт нэмэгдэж, хүүхдийн эмч, эх барих эмэгтэйчүүд, эх баригч орон тоогоор ажиллаж, тусламж үйлчилгээний чанар хүртээмж нэмэгдэн эрх зүйн баримт бичиг, стандарт эмнэлзүйн удирдамжийн хэрэгжилт сайжирсан гээд олон эерэг үзүүлэлтүүд гарчээ.