“Гарааны бизнес-2022” төсөлд шалгарсан үйлдвэрлэгчдэд батламжийг нь гардууллаа

 “Цахим Эрдэнэт-1”, “Эрдэнэтчүүд Эдэнэтчүүддээ” хайртай хөтөлбөрийн хүрээнд хөдөлмөр эрхлэлт, ажлын байр нэмэгдүүүлэх зорилгоор “ГАРААНЫ БИЗНЕС-2022” төслийн сонгон шалгаруулалтыг нэг сарын хугацаанд  зарласан.  Энэ сарын 6-наас төслийн сонгон шалгаруулалтыг эхлүүлсэн бөгөөд дээрх хугацаанд  Эрдэнэт Шинжлэх ухаан технологийн парк /ЭШУТП/, сумдын ЗДТГ, багуудын ажлын албатай хамтран 150 гаруй иргэнд сургалт мэдээллийг өгсөн байна. 

      Өнгөрсөн даваа гаригт  62 төсөл танилцуулагдсанаас 38 төсөл шалгарч өнөөдөр батламжаа гардлаа. Энэ жил үйл ажиллагаа нь тогтворжсон, суурьтай үйлдвэрлэгч нарыг шалгаруулах зорилт тавьсан хэмээн ажлын хэсгийнхэн онцолсон. 

• Шинэлэг брэнд бүтээгдэхүүн ангилалд нэг төсөл шалгаруулхаас арьсан эдлэлээр үйлдвэрлэл эрхэлдэг “Өндөрлөг” брэнд шалгарч 10 сая төгрөг, 
• Цаас, ургамал, мод, өөх тосны хаядлаар шахмал түлш үйлдвэрлэх ангилалд гурван төсөл ирснээс “Агдир бүтэмж” ХХК шалгарч 40 сая төгрөг, 
• Яс, малын гаралтай органик хаягдал дахин боловсруулах нэг төсөл шалгаруулхаас “ХОС ЛУУ БАЯН” ХХК-ийн төсөл шалгарч 40 сая төгрөгийн санхүүжилт аван үйлдвэрлэлээ өргөжүүлэх боломжтой болов.   

         Мөн 2019 оноос өрхийн үйлдвэрлэл эрхэлж байгаа  “Бороодой” брэндийг үүсгэн байгуулагч иргэн Д.Энхнаран нярайн хүүхдийн өлгийн багц төслөөр таван сая төгрөгийн санхүүжилт авч, үйлдвэрлэлээ өргөжүүлж, шинээр хоёр ажлын байр нэмэгдүүлэх боломжтой боллоо. 

       Засаг дарга С.Батжаргал “Монгол Улсын Засгийн газрын Шинэ сэргэлтийн бодлогод “өөрсдөө үйлдвэрлэгч, бүтээгч байя” гэсэн зорилтыг дэвшүүлсэн. Үүнд жижиг, дунд бизнес эрхлэгчид чухал үүрэг гүйцэтгэнэ. Тэр утгаараа  ажлын хэсгийнхэн үйл ажиллагаа нь тогтворжсон үйлдвэрлэл эрхлэгчдийн төслийг сонгосон гэж хэлж  байна. Ирсэн төслүүд ч өмнөх жилүүдийнхээс илүү чамбай болсон байна. Аливаа зүйлийг хийхийг хүсэж, тэмүүлж байгаа иргэн, аж ахуйн нэгжүүдээ дэмжих нь зүй ёсны хэрэг. Энэ төсөл маань хүүгүй, барьцаагүй олгогдож байгаа. Нэг үгээр хэлбэл, итгэлцэл дээр олгогдож байгаа учраас хаа хаанаа хариуцлагатай  байх хэрэгтэй" гэв. 

 Төсөл сонгон шалгаруулалтын ажлын хэсэгт  Ажил олгогч эздийн нэгдсэн холбоо, аймгийн Худалдаа аж үйлдвэрийн танхим зэрэг хөндлөнгийн байгууллагын  11 гишүүн багтаж ажилласан.