"Гарааны бизнес-2022” төслийн сонгон шалгаруулалт болж байна

Аймгийн Засаг даргын А/358 захирамжийн дагуу “Эрдэнэтчүүд Эрдэнэтчүүддээ хайртай” хөтөлбөрийг хэрэгжүүлж буй. Уг хөтөлбөрийн хүрээнд   хэрэгжиж буй “Гарааны бизнес-2022” төслийн сонгон шалгаруулалтыг энэ сарын 6-нд олон нийтэд мэдээлж зарласан билээ.
    Өнөөдөр төслийн сонгон шалгаруулалт явагдаж, төсөлд оролцогчид төслөө танилцуулж байна.  “Гарааны бизнес-2022” төслийн зорилго нь өрхийн болон бичил бизнес эрхлэгчид, хог хаягдал дахин боловсруулах үйлдвэрлэл хөгжүүлэх, ажлын байр нэмэгдүүлэх зорилготой юм.
          Дээрх хугацаанд 150 гаруй иргэнд төслийн талаарх сургалт мэдээллийг өгсөн тухай “Гарааны бизнес-2022” төслийн сонгон шалгаруулалтын ажлын хэсгийн ахлагч аймгийн Засаг даргын орлогч А.Түвшинжаргал хэлсэн. 
 Сонгон шалгаруулалт  нийт долоон ангилалд явагдаж 62 төслөөс 38 төслийг шалгаруулж 270 сая төгрөгийн санхүүжилт олгох юм. 

•  Цаас болон бусад хог хаягдал дахин боловсруулах,
• Яс болон буусад хог хаягдал дахин боловсруулах 
• Шинэлэг брэнд бүтээгдэхүүн, 
• Өрхийн болон бичил бизнес /үйлдвэрлэлл, үйлчилгээ, хүнс хөдөө аж ахуй, оёдол/ зэрэг ангиллаар сонгон шалгаруулах юм. 

38 иргэн, хуулийн этгээдэд эргэн төлөгдөх нөхцөлөөр олгох уг зээл нь:

•  Нэгдүгээрт, өрхийн болон бичил бизнес эрхлэгч  34 байх бөгөөд үүний 5 нь оёдол, сүлжмэл байх юм. Эдгээрт тус бүр таван сая нийт 170 сая төгрөг,
•  Хоёрдугаарт, шинэлэг, брэнд бүтээгдэхүүн үйлдвэрлэлд  хоёр төсөл шалгаруулж тус бүр 10 сая төгрөгийн зээлийг төрийн болон орон нутгийн бизнес хөгжүүлэх чиглэлээр олгосон зээлийн үлдэгдэлгүй байх, хугацаагүй хөдөлмөрийн гэрээ, ажлын байртай нийгмийн даатгал төлөгч, батлан даагчтай  байх зэрэг шаардлагад үндэслэн олгох юм.
•  Гуравдугаарт, цаас, ургамал, мод, өөх тосны хаядлаар шахмал түлш үйлдвэрлэх  хуулийн этгээдийн нэг төслийг сонгон шалгаруулж 40 сая төгрөг,
• Дөрөвдүгээрт, яс, малын гаралтай органик хаягдал дахин боловсруулах 1 хуулийн этгээдэд  мөн 40 сая төгрөгийн зээлийг олгох юм байна. Аж ахуйн нэгжүүдэд  хуулийн этгээд байх, Орхон аймгийн хэмжээнд бий болж буй хаягдал цаас, ясыг дахин боловсруулах, логистик шийдвэрлэх гэсэн үндсэн шаардлагыг тавьж байна.

Иргэн, аж ахуйн нэгжид хөнгөлөлттэй нөхцөлөөр олгох энэхүү зээл нь  цар тахлын дараах эдийн засаг хүндрэлтэй байгаа энэ цаг үед өрхийн бичил бизнес, эрхлэгч болон жижиг дунд үйлдвэрлэлүүдээ дэмжих, тэдний бизнесийг нь сэргээхэд ихээхэн чухал арга хэмжээ болно гэж төсөл хэрэгжүүлэгчид үзэж байна. 

Мэдээллийн төв