Боловсролын салбарын төсвийг хамт олны оролцоотой төлөвлөж зарцуулдаг байх “Боловсролын салбарын төсвийн шинэчлэл”-ийг Орхон аймагт танилцууллаа

БСШУЯ-наас боловсролын чанар, үр дүнг дэмжсэн төсвийн шинэчлэлийг эхлүүлж,  энэ хүрээнд анхан шатны нэгж дээр төсвийг хамт олны оролцоотой төлөвлөх, хуваарилах, зарцуулах чиглэлээр мэдээлэл, зөвлөмж өгөх уулзалтыг өнгөрсөн сарын 13-наас орон даяар эхлүүлсэн. Өнөөдөр Орхон аймагт  “Боловсролын салбарын төсвийн шинэчлэл”-ийг таниулах сургалт, уулзалт үргэлжилж 2022 оны боловсролын салбарын төсөв, хувьсах зардлын шинэчлэлийн хүрээнд хийж хэрэгжүүлж буй ажлын мэдээллийг нийт багш, ажилтнуудад өгч байна.   

     Шинэчлэлийн хүрээнд боловсролын байгууллагын санхүүгийн бие даасан байдал хангагдаж хувьсах зардал, сургуулийн бүтэц хэв шинж, сургалтын чанарт суурилсан цалин урамшууллын тогтолцоо цогцоороо шинэчлэгдэж байгаа юм. Мөн хувьсах зардалд багшийн эрүүл мэндийн үйлчилгээ, дата хэрэглээний зардал, хичээл практикийн зардал, багшийн мэргэжлийн тасралтгүй хөгжлийн зардлыг тусгаж, эдгээр зардлын төлөвлөлт зарцуулалтад багш нарын оролцоог нэмэгдүүлж, өнгөрсөн хугацаанд хүртээмжийг нэмэгдүүлэхэд чиглэж байсан боловсролын салбарын хөрөнгө оруулалт төсөв нь чанарт илүү анхаарч эхэлж байгаагаараа  онцлог болж байна. 

Орхон аймагт боловсролын салбарын төсвийн шинэчлэлийг үр дүнтэй хэрэгжүүлэх зорилгоор аймгийн ЗДТГ, БСШУ-ны газар, ерөнхий боловсролын сургууль, сургуулийн өмнөх боловсролын байгууллагын төлөөллийг оролцуулан 50 гаруй хүний бүрэлдэхүүнтэй ажлын хэсэг ажиллаж байна.

Засаг даргын 2020-2024  оны үйл ажиллагааны хөтөлбөрт тусгагдсан зорилт арга хэмжээ, аймгийн боловсролын салбарт хэрэгжиж буй бусад бодлого, хөтөлбөрүүдийн  хүрээнд боловсролын салбарын төсвийн шинэчлэлийн бодлоготой уялдахуйц олон талт ажлыг хэрэгжүүлж  буй.

     Тухайлбал, төрийн болон хувийн хэвшлийн 20 гаруй сургуульд шалгалтын тест засагч төхөөрөмж, сургалтын үйл ажиллагаанд ашиглагдах ухаалаг самбар нийлүүлэх ажлыг орон нутгийн төсвийн 700 гаруй сая төгрөгийн хөрөнгө оруулалтаар шийдвэрлэсэн. Мөн улсын төсвийн 1,7 тэрбум төгрөгийн хөрөнгө оруулалтаар ерөнхий боловсролын сургууль, сургуулийн өмнөх боловсролын багш нарын хичээл сургалтын үйл ажиллагаанд ашиглах нөүтбүүк, таблетаар бүрэн хангасан.
   Мөн орон нутагт хэрэгжиж буй "Багш" хөтөлбөрийн хүрээнд  багшийн тасралтгүй хөгжлийг дэмжих, багшийн нэр хүнд үнэлэмж, ёс зүйн харилцаа хандлагыг дээшлүүлэх нийгмийн баталгааг хангах чиглэлээр олон талын үйл ажиллагааг төлөвлөн хэрэгжүүлж байна. Хөтөлбөрийн хүрээнд өнгөрсөн 5 жилийн хугацаанд давхардсан тоогоор 1700 гаруй багш ажилтныг багшийн тасралтгүй хөгжлийг хангах төрөл бүрийн сургалтуудад хамруулсан нь өнөөдөр хийгдэж буй төсвийн шинэчлэлийн бодлоготой уялдаж байгааг Засаг даргын нийгмийн хөгжлийн асуудал хариуцсан орлогч А.Түвшинжаргал онцолсон. 

     Чанар, үр дүнд суурилсан төсвийн шинэчлэл хийгдэж эхэлснээр орон нутагт ажиллаж буй багш ажилчдын цалин бодитоор нэмэгдэж, хичээлийн хэрэглэгдэхүүний зардал цахим хэрэглээний зардал шийдэгдэж, байгууллагын үйл ажиллагааны чанар үр дүнд суурилсан гүйцэтгэлийн үр дүнгийн урамшуулал олгох тогтолцоонд шилжиж байгаа нь багш нарын ажиллах урам зоригийг нэмэгдүүлэх зэрэг бодит үр дүнд хүрч  байна.