Авто зам дагуух төлөвлөгдсөн зураг төсвийг яаралтай ирүүлэх үүрэг өглөө

Даваа гараг бүрийн 11:00 цагаас хуралддаг Засаг даргын шуурхай хуралдаан боллоо. Хуралдааныг Засаг дарга С.Батжаргал удирдан явууллаа. 
Хуралдааны эхэнд аймгийн Засаг даргын Тамгын газрын хуулийн хэлтсийн дарга М.Мөнхбаяр 5-р сарын 1-ээс хэрэгжиж эхэлж буй хуулиудын талаар товч мэдээлэл өглөө. 
        Томуу, томуу төст өвчнөөс урьдчилан сэргийлэх чиглэлээр өрхийн эрүүл мэндийн төв болон хувийн хэвшлийн 8 хүүхдийн эмнэлгийн нийт 27 их эмчийг БОЭТ-ийн Хүүхдийн хүлээн авах тасагт хуваарь гарган ажлын өдрүүдэд 16:00-22:00, амралтын өдрүүдэд 14:00-22:00 цагуудад дайчлан ачаалал бууруулан түргэн шуурхай үйлчилгээ үзүүлэх зорилгоор ажиллуулж байгаа талаар мэдээлэл хийгдлээ. 
        “Сэтгэлийн анир” төслийн хүрээнд эхлүүлсэн ерөнхий боловсролын сургуулиудад сэтгэлзүйч ажиллуулахаар төлөвлөөд буй. Үүний хүрээнд одоогийн байдлаар Ерөнхий боловсролын 1, 4, 5, 8, 13, 14, 15, 18-р сургуулиудад 8 сэтгэлзүйч ажиллуулаж байна. Цаашид нийт ерөнхий боловсролын  сургуулиудад сэтгэлзүйч ажиллуулах төлөвлөгөөтэй хэдий ч энэ талын  боловсон хүчин Орхон аймагт дутагдалтай байгаа ажээ. 
        Шуурхайн төгсгөлд Засаг дарга С.Батжаргал хөрөнгө оруулалтын ажлуудыг чанартай бөгөөд цаг хугацаанд нь хийж хүлээлгэж өгөх асуудалд анхаарах, “Эрдэнэт цэцэрлэгт хүрээлэн”-ийн ойр хавьд зөвшөөрөл авсан худалдаа үйлчилгээний газруудыг нэг ижил хийцтэй, угсардаг загвар бүхий болгох талаар холбогдох газруудад үүрэг өглөө. Мөн ГХБХБ-ын газарт авто зам дагуух төлөвлөгдсөн зураг төсвөө яаралтай гаргаж өгөх талаар анхаарууллаа. Учир нь иргэд зам дагуу газар хүсэх, зөвшөөрөлгүйгээр авто зам дагуу газарт үйл ажиллагаа явуулах нь зам өргөтгөх асуудалд саад учруулж болзошгүй байна гэв.