“Улсын төрөлжсөн олимпиадын II даваа”-нд амжилттай оролцсон багш, сурагчдыг урамшууллаа

“Улсын төрөлжсөн олимпиадын II даваа”-нд амжилттай оролцсон багш, сурагчдыг урамшуулах үйл ажиллагаа өнөөдөр Эрдмийн сан сургууль дээр боллоо. Цар тахалтай холбоотойгоор хоёр жил зохион байгуулаагүй тус олимпиадыг энэ жил есөн судлагдахуунаар гурван үе шаттай зохион байгуулсан.

Боловсролын ерөнхий газрын даргын 2022 оны 164 тоот “Олимпиадын хуваарь шинэчлэн хүргүүлэх тухай”  албан бичгийн дагуу....

• Нэгийн давааг ерөнхий боловсролын сургуулийн  хэмжээнд  хоёрдугаар сарын 19-дөрөвдүгээр сарын 5-ны хооронд,
• Хоёрын давааг  аймгийн хэмжээнд дөрөвдүгээр сарын 5-наас дөрөвдүгээр сарын 9-ны хооронд,
• Гурвын давааг улсын хэмжээнд  дөрөвдүгээр сарын 2-нээс тавдугаар сарын 13-ны хооронд зохион байгуулсан.

“Улсын төрөлжсөн олимпиадын II даваа”-г зохион байгуулах салбар комисс Боловсрол шинжлэх ухааны газрын даргын 2022 оны А/16 тоот “Салбар комисс байгуулах тухай” тушаалаар  баримтлах дэг, оролцогчдын тоог баталгаажуулж зохион байгуулалтыг хийсэн. Нийт 9 салбар комисс 65 хүний бүрэлдэхүүнтэйгээр байгуулагдаж,  салбар комиссын даргаар сургуулийн захирлууд, нарийн бичгийн даргаар судлагдахуун хариуцсан мэргэжилтнүүд ажилласан. Улсын төрөлжсөн олимпиадын гурвын даваанд амжилттай оролцсон багш, сурагчдыг сар шинийн өмнө урамшуулдаг журамтай билээ.

“Улсын төрөлжсөн олимпиадын II даваан”-нд ерөнхий боловсролын 23 сургуулийн 509 суралцагч 278 багш 9 судлагдахууны 29 төрлөөр оролцсоноос математик судлагдахууны төрөлд хамгийн олон  буюу 150 сурагч, багш нараас мөн төрөлд хамгийн олон буюу 62 багш оролцсон байна. Аймгийн Ерөнхий боловсролын 14 дүгээр сургуулийн сурагчид амжилтаараа тэргүүлсэн бол Эрдмийн сан сургуулийн сурагчид удаах байранд орсон амжилтыг үзүүлжээ.

Харин III даваанд ерөнхий боловсролын 11 сургуулийн 24 сурагч, 10 багш   оролцож, сурагчийн төрөлд нийт 6 медаль, багшийн төрөлд 8  медалийг тус тус хүртсэн амжилт гаргав.
2021-2022 оны хичээлийн жилийн Улсын төрөлжсөн олимпиадад математикийн төрөлд Эрдмийн сан сургуулийн математикийн багш Р.Доржзовдын бэлтгэсэн сурагчид багийн дүнгээр улсад II  байр эзэлсэн амжилтыг үзүүллээ.
    Мөн VII сургуулийн биологийн багш Д.Бямбасүрэн “Улсын шилдэг илтгэл” шалгаруулах 55 дахь удаагийн эрдэм шинжилгээний хуралд  амжилттай оролцож тэргүүн байр эзэлжээ.
Багш, сурагчдыг урамшуулах үйл ажиллагаанд аймгийн Засаг даргын орлогч А.Түвшинжаргал, Боловсрол, соёл урлагийн газрын дарга О.Ариунгэрэлт, Монгол Улсын гавьяат багш С.Мэнджаргал нар оролцлоо.  Засаг даргын орлогч А.Түвшинжаргал улс, бүс, аймгийн олимпиадад үе тэнгийнхээ манлайлан  амжилттай оролцож, цаашлаад  аймаг орон нутгийнхаа нэрийг гаргасан багш, сурагчдад талархал илэрхийлэн, сурлага хөдөлмөрийн өндөр амжилтыг хүслээ.