Бүсчилсэн хөгжлийн шинэчилсэн үзэл баримтлалд санал өгөх ажлын хэсэг хуралдлаа

“Алсын хараа-2050”, Шинэ сэргэлтийн бодлого зэрэг урт хугацааны бодлогын баримт бичгүүдэд “Бүсчилсэн хөгжил” гэсэн тусгай бүлэг орсон байдаг.  Үүнтэй холбоотойгоор Эдийн засгийн хөгжлийн яамнаас Бүсчилсэн хөгжлийн шинэчилсэн  үзэл баримтлалд  тусгах аймгуудын саналыг авч байгаа  бөгөөд Орхон аймаг энэ сарын 21-нд саналаа танилцуулах юм.
Засаг даргын захирамжаар Засаг даргын орлогч А.Түвшинжаргалаар ахлуулсан ажлын хэсэг хуралдаж, газар хэлтсүүдээс өгсөн саналын талаар хэлэлцэж, санал солилцлоо.
Энэ удаагийн хурлаар  холбогдох бусад газруудаас санал авч,саналуудыг дахин боловсронгуй болгож, нэгтгэн дараагийн хурлаар хэлэлцүүлэхээр тогтов. Мөн ажлын хэсэгт бүсчилсэн хөгжлөөр судалгаа, эрдэм шинжилгээний ажил хийдэг эрдэмтэн судлаачдыг оролцуулахаар болсон.
Монгол Улс “Бүсчилсэн хөгжлийн үзэл баримтлал”-ыг 2001 онд, “Бүсчилсэн хөгжлийн удирдлага, зохицуулалтын тухай” хуулийг 2003 онд, “Үндэсний хөгжлийн цогц бодлого”-ыг 2007 онд УИХ-аараа баталсан. Бүсчилсэн хөгжлийн үзэл баримтлал, түүнийг хэрэгжүүлэх Засгийн газрын хөтөлбөрүүдийн хүчинтэй хугацаа 2020 онд дуусгавар болсон учир шинээр боловсруулах шаардлага үүссэн.

Эхний үзэл баримтлалд улсыг Баруун, Хангайн, Төвийн, Зүүн гэж босоо тэнхлэгээр дөрөв хувааж, Улаанбаатарыг бие даасан бүсийн жишгээр хөгжүүлэхээр тусгасан байдаг.

ШИНЭ БҮСЧИЛСЭН ХӨГЖЛӨӨР МОНГОЛ УЛСЫГ...

• Хангайн эрчимжсэн хөдөө аж ахуй, аялал жуулчлал, ногоон хөгжлийн бүсэд Орхон,  Сэлэнгэ, Дархан-Уул, Булган, Архангай, Хөвсгөл, Завхан;​​​​​
• Дорнод монголын эдийн засгийн хөгжлийн тэнхлэг, үйлдвэрлэл, аялал жуулчлал, ногоон хөгжлийн бүсэд Хэнтий, Сүхбаатар, Дорнод;  
• Хариуцлагатай уул уурхай, өндөр технологид суурилсан үйлдвэрлэл, үйлчилгээ, палеонтологийн аялал жуулчлалын бүсэд Говьсүмбэр, Дорноговь, Дундговь, Өмнөговь;
• Байгалийн нөөц, аялал жуулчлал, ногоон хөгжлийн бүсэд Говь-Алтай, Баянхонгор, Өвөрхангай;
• Өрнөд монголын эдийн засгийн хөгжлийн тэнхлэг, Алтайн соёл, байгалийн нөөц, ногоон хөгжлийн бүсэд  Ховд, Баян-Өлгий, Увс;
• Олон улсын шинжлэх ухаан, технологийн төв, тээврийн зангилаа, өндөр технологийн үйлдвэрлэл, үйлчилгээний бүсэд Улаанбаатар гэсэн зургаан бүсэд хувааж хөгжүүлэхээр зорьж байна.