Аймгийн боловсролын салбарын хөрөнгө оруулалт, засвар, үйлчилгээний талаар уулзалт хийлээ

Засаг даргын нийгмийн асуудал хариуцсан орлогч А.Түвшинжаргал, Хөгжлийн бодлого төлөвлөлт, хөрөнгө оруулалтын хэлтсийн дарга С.Даваадорж, Боловсрол, соёл урлагийн газрын дарга О.Ариунгэрэлт нар аймгийн  ерөнхий боловсролын сургууль, цэцэрлэгийн удирдлагуудтай уулзлаа. Уулзалтаар 2023 онд боловсролын салбарт хийгдэх  хөрөнгө оруулалтын ажил  болон  тулгамдаж буй асуудал, бэрхшээлийн талаар санал солилцов.
  Засаг даргын орлогч А.Түвшинжаргал “2023 оны улсын төсвийн хөрөнгө оруулалтаар боловсролын салбарт хийгдэх засвар, үйлчилгээний ажлын саналыг авч байна.Та бүхний гаргасан саналыг цааш судлуулна. Мэргэжлийн байгууллага, холбогдох мэргэжилтнүүд бодит байдалтай танилцана.

Аймаг, орон нутгийн зүгээс боловсролын салбарт тодорхой хэмжээний хөрөнгө оруулалтыг хийгээд явж байгаа. Байгууллагуудын асуудал дуусахгүй. Тэр бүгдийгээ дэс дараатай шийдээд явъя. Онцгой нөхцөл байдал үүсэхэд Аваарын зардлаас төсөв мөнгийг нь шийдээд засвар үйлчилгээг хийдэг. Зөв хэрэгцээтэй зүйлдээ зарцуулах нь чухал.

Хүүхдийн аюулгүй байдалтай холбоотой зайлшгүй хийх шаардлагатай засвар, үйлчилгээг бид төсвийг нь шийдээд засварлахаас өөр аргагүй. Онцгой нөхцөл байдал үүсээд байгаа зарим сургууль, цэцэрлэгийн дээврийн засвар үйлчилгээнд онцгой анхаарна” гэлээ.
Төрийн болон хувийн хэвшлийн ерөнхий боловсролын 12 сургууль, 22 цэцэрлэг тулгамдаж буй зайлшгүй асуудлуудынхаа саналыг эрэмбэлжээ. Сургууль, цэцэрлэгийн ихэнх нь дээвэр, гадна, пасад шугам хоолоотой холбоотой засвар үйлчилгээ шаардлагатай байгааг хэлж байв. Тухайлбал, ерөнхий боловсролын 1 дүгээр сургуульд сантехникийн иж бүрэн засвар хийх нөхцөл байдал үүсчээ. 2013 оноос хойш тус сургуульд засвар хийгээгүй бөгөөд, 2017 онд Мэргэжлийн хяналтын улсын байцаагчийн дүгнэлт гарсан байна. Өнгөрсөн өвөл паар задарч Аваарын зардлаас төсвийг шийдэж засвар үйлчилгээний ажлыг хийж гүйцэтгэжээ.
19 дүгээр цэцэрлэгийн дээвэр засварлах шаардлагатай.  1989 онд ашиглалтад орсон тус цэцэрлэг хоёр удаа хэсэгчилсэн засвар хийжээ. 2015 онд хамгийн сүүлд засвар хийсэн бөгөөд энэ хугацаанд өөрсдийн нөөц боломжоор засварласаар ирсэн ч хүч хүрэхгүй байгаагаа тус цэцэрлэгийн эрхлэгч учирласан.
Мөн  дараагийн удаа 2022 оны өвөлжилтийн бэлтгэл ажлын талаар сургууль, цэцэрлэгийн удирдлагуудтай  уулзаж санал солилцохоор боллоо.