“Бүх хайраа гэр бүлдээ” сарын аяны хүрээнд зохион байгуулах үйл ажиллагааны талаар мэдээлэл өглөө

Хүүхдийн эрхийн тухай хууль, Хүүхэд хамгааллын тухай хууль, Гэр бүлийн тухай хуулийн хэрэгжилтийн хүрээнд  “Бүх хайраа гэр бүлдээ”,  “Нэгдүгээрт хүүхэд” хөгжил, хамгааллын нэг сарын хугацаатай аяныг тус тус өрнүүлж буй.  Дээрх аянуудын хүрээнд хийх ажлын төлөвлөгөөний талаар Гэр бүл, хүүхэд залуучуудын хөгжлийн газраас хэвлэлийн бага хурал хийлээ. Тавдугаар сарын 15-нд “Дэлхийн гэр бүлийн өдөр” тохиодог.  Уг өдрийг тохиолдуулан нийгмийн анхдагч нэгж болох “Гэр бүл”-д тулгамдсан асуудал, чухалчлагдаж буй сэдвийн хүрээнд төр, төрийн бус байгууллага, судлаач, иргэдийн үзэл бодол, байр суурийг харилцан солилцуулах, цаашид гэр бүлд чиглэсэн арга хэмжээнд тусгах, улмаар гэр бүлийн харилцааны тухай мэдлэг ойлголтыг хөгжүүлэх, эерэгээр нөлөөлөх, гэр бүлийн сайн сайхны төлөөх үйл ажиллагааг дэлгэрүүлэх нь  “БҮХ ХАЙРАА ГЭР БҮЛДЭЭ" аяны зорилго юм. 

АЯНЫ ХҮРЭЭНД...

• энэ сарын 13-нд “Гэр бүлийн хөгжлийн уламжлалт чиг хандлага” сэдэвт онол практикийн бага хурал, 
• 10-д Эрдэнэт цэцэрлэгт хүрээлэнд гэр бүлийн өдөрлөг,
• 18-нд Уурхайчин соёлын ордонд  200 гэр бүлийн төлөөллийг оролцуулан гэр бүлийн чуулга уулзалтыг тус тус зохион байгуулна. 
•  19,20-нд өдөр сэтгэл зүйчдийн өдөрлөгийг зохион байгуулж, ганцаарчилсан болон бүлгийн  сэтгэлзүйн зөвлөгөө, мэдээллийг иргэдэд олгох юм байна.

Түүнчлэн “Дэлхийн гэр бүлийн” өдрийг тохиолдуулан аймгийн Гэр бүлийн ордноос залуу гэр бүлд хүндэтгэл үзүүлэх үнэ төлбөргүй хуримын үйл ажиллагааг зохион байгуулах талаар мэдээлэл өглөө. Тодруулбал, төрийн байгууллагад ажиллаж буй гэр бүлээ батлуулаагүй залуу 10 гэр бүлийг Амарын талбайд ёсчлон батлах  үйл ажиллагаа энэ сарын 18-нд болно. Мөн энэ өдөр Гэр бүлийн ордны үйл ажиллагааг танилцуулах өдөрлөг болно. Энэ сарын 6-ныг хүртэл төрийн  байгууллагуудаас залуу гэр бүлийн  санал авч түүн дээр тулгуурлан 10 гэр бүлийг батламжлах ажээ. 
Гэр бүл, хүүхэд залуучуудын хөгжлийн газрын мэргэжилтэн Л.Отгонцэцэг “Нэгдүгээрт хүүхэд” хүүхдийн хөгжил, хамгааллын нэг сарын аяны талаар мэдээлэл өгөв. Уг аяны хүрээнд аймгийн ИТХ, Хүүхдийн оролцооны нэгдсэн төвтэй хамтран “Мини парламент” үйл ажиллагааг зохион байгуулахаар бэлтгэл ажлыг хангаж байна.
Мөн аймгийн Засаг дарга, Хүүхдийн зөвлөлийн дарга  С.Батжаргалын санаачлагаар “Хүүхдээ сонсох өдөр”-ийг зохион байгуулах бөгөөд энэ жил  Мэргэжил сонголт сэдвээр ерөнхий боловсролын сургуулийн сурагчидтай уулзалт хийхээр төлөвлөжээ.
Аяны  хамтран зохион байгуулагчаар аймгийн ЗДТГ, ИТХ, Боловсрол, соёл, шинжлэх ухааны газар, Эрүүл мэндийн газар, ОБГ, Хөдөлмөр халамж үйлчилгээний газар гээд төрийн бүхий л байгууллагууд оролцож байна.