Манай аймагт 1000 бүжигчдийн фестиваль болж байна

 Өнөөдөр дэлхийн бүжгийн өдөр тохиож байна. Энэ өдөр Орхон аймаг Эрдэнэт хотод 1000 гаруй бүжигчид чуулсан "Эрдэнэтийн угалз" фестиваль нээлтээ хийлээ.
Тус бүжгийн наадмыг аймгийн Засаг даргын Тамгын газар болон Соёлын газар нь Соёлын яам, Монголын мэргэжлийн урлагийн зөвлөл, Монголын бүжгийн нэгдсэн холбоодтой хамтран зохион байгуулж байна.
     Энэ жилийн “Эрдэнэтийн угалз” фестивальд нийслэл Улаанбаатар хотоос болон 15 аймгийн төлөөлөл оролцож байна. Тодруулбал 8 наснаас 80 нас хүртэлх 77 багийн 1000 гаруй бүжигчид өнөөдөр, маргааш хоёр өдөр бүжгийн бүхий л төрлөөр авьяас, ур чадвараа сорино.  Ингэхдээ нийт 1300 гаруй багц медаль, нас насны ангиллын 9 цомын төлөө  өрсөлдөх юм.
     Орхон аймгийн тухайд 3 цэцэрлэг, 3 бүжгийн клуб, ахмадын нийтийн бүжгийн 2 хамтлаг оролцож байгаа ажээ. Энэ жилийн тухайд бүжгийн урлагийн багш боловсон хүчин залуужиж, шинээр шинэ уран бүтээлчид ихээр оролцож байгаа нь өмнөх жилүүдээс онцлогтой, өрсөлдөөн ихтэй байна гэдгийг албаны хүн хэлж байлаа.
     Манай аймаг уламжлал болгон зохион байгуулдаг Хаврын баяр бүжгийн тэмцээнийг энэ жил 26 дахь удаагаа зохион байгуулж байгаа. Сүүлийн жилүүдэд энэхүү наадам бүжгийн фестиваль болон өргөжин тэлсээр бусад аймаг орон нутаг, нийслэлийн бүжигчдийг хамруулсан томоохон арга хэмжээ болон зохион байгуулагдаж ирсэн нь энэ юм.