Орхон аймаг салбар бүртээ манлайлах “Оюуны элч”-ийг бэлтгэж эхэллээ

Орхон аймаг салбар салбартаа манлайлал үзүүлж, ур чадвараараа бусдыгаа уриалан дуудаж аймаг орон нутгийнхаа хөгжил дэвшилд хувь нэмрээ оруулах “Оюуны элч” манлайлагчдыг өнөөдрөөс бэлтгэж эхэллээ.  ЗДТГ, “Олон улсын мэргэжлийн хөгжлийн институт”-тай хамтран “Чадварлаг Монгол хүн” хөтөлбөрийн хүрээнд “Оюуны элч” манлайлагчдыг бэлтгэх сургалт  өнөөдөр Залуучуудын ордонд нээлтээ хийв.
    Засаг дарга С.Батжаргал “Орхон аймгийг 2024 он хүртэл хөгжүүлэх “Хүний хөгжлийн” цогц хөтөлбөр хэрэгжиж байгаа. Хөтөлбөрийн нэг хэсэг болгон "Оюуны элч" нарыг салбар бүрт бэлтгэх эхлэлийг тавьж байгаадаа баяртай байна. Орон нутгийн хөгжил чадварлаг иргэн, чадвартай боловсон хүчнээс эхлэлтэй.  Сургалтын эхний үе шатанд хамрагдаж байгаа багш нар  “Оюуны элч” бэлтгэх энэхүү хөтөлбөрийг цаашид түүчээлэн оролцоно гэдэгт итгэлтэй байна” гэлээ.

   “Чадварлаг Монгол” хүн гэж ямар хүнийг хэлэх вэ гэсэн тодорхойлолтод Хүний нөөцийн аудитор Б.Батгэрэл “Үндэсний брэнд гэхээр бид бараа бүтээгдэхүүн гэж ойлгодог. Тэгвэл Монгол Улсын брэнд чадвартай, зөв хандлагатай Монгол иргэнийг хэлнэ” гэж хариулсан. Хөтөлбөрийн хүрээнд хэрэгжүүлж буй “Оюуны элч” сургалтаар Монгол хүний үнэ цэнэ,язгуур эрх ашиг, үнэт зүйлийг түгээн дэлгэрүүлнэ гэж тэрээр тодотгов.

    “Чадварлаг- Монгол Хүн” хөтөлбөрийн зорилго нь бүх насны ард иргэд болон бүхий л салбарт ажиллаж буй хүний нөөцийн хөгжлийн тогтолцоо, үйл ажиллагааны удирдамж, чиглэл болж улмаар хүний нөөцийн мэдлэг чадвар, ёс зүйн төлөвшлийг сайжруулах, чадавхыг бэхжүүлж, төрийн үйлчилгээг иргэдэд ойртуулах, шуурхай, чанартай болгох, дэлхийн сүүлийн үеийн арга барилыг орон нутагт нутагшуулах, нийгмийн асуудлыг дэмжих, хүний нөөцийн тогтвортой байдлыг хангахад оршиж байгаа юм. Түүнчлэн хувь хүмүүсийн болон байгууллагын соёлд нөлөөлөх бодит үр дүнд тулгуурлан сургалтын хэрэгцээ шаардлагыг тодорхойлж түүндээ дүн шинжилгээ хийж, дүгнэлт зөвлөмж өгнө. Ингэснээр Орхон аймаг хувь хүн, байгууллагуудад тавигдах ёс зүй, мэдлэг, ур чадварын жишиг загвар аргачлалтай болж,аймгийн хэмжээнд нэвтрүүлэхүйц загвар тогтолцоо болох эхлэл тавигдана гэж үзэж байна.

Өнөөдрийн сургалтад оролцож буй  100 гаруй ЕБС болон СӨБ-ийн багш нар өөрийн алсын хараа эрхэм зорилгыг тодорхойлж, өөрийн амьдралд оруулах хувь нэмэр, ажлын үнэт зүйлийг тодорхойлох, түүнчлэн хамт олонтойгоо сайн, үр дүнтэй харилцааг бий болгоход хувь хүний манлайлал, бүтээгч хүний зан төлөвийг ойлгон хэрэгцээ шаардлагыг зөв тодорхойлох зэрэг зайлшгүй эзэмшвэл зохих суурь ур чадварт суралцах юм.