Хог хаягдал боловсруулах үйлдвэрийн төсөл хэрэгжүүлэгч Польшийн “Мэлиорекс” компанийн удирдлагуудтай уулзлаа

Монгол, Польш хоёр  улсын Засгийн газар хоорондын хэлэлцээрийн дагуу Орхон аймагт хатуу хог хаягдал боловсруулах үйлдвэр барих гэрээг 2019 онд үзэглэсэн. Хог боловсруулах үйлдвэрийн барилга угсралт болон бусад ажлын гүйцэтгэгчийг шалгаруулах тендерийг Сангийн яамнаас зохион байгуулж Польшийн “Мэлиорекс” компани шалгарсан ч дэлхий нийтийг хамарсан коронавирус цар тахалтай холбоотойгоор өнөөг хүртэл бүтээн байгуулалтын ажил эхлэлгүй хойшлоод байсан билээ. Өнөөдөр тус компанийн гүйцэтгэх захирал Михал Вашениук бусад албаны хүмүүсийн хамтаар Засаг дарга С.Батжаргалтай  уулзаж, төслийн талаар санал солилцлоо.

    Засаг дарга С.Батжаргал  уулзалтын эхэнд “Амаргүй цаг үеийг бид үдлээ. Засгийн газраас аймгуудыг хогны асуудлаа цэгцлэх үүрэг даалгаврыг өгсөн. Нөгөө талаас энэ төслийн талаарх мэдээллийг иргэдэд өгснөөс хойш багагүй хугацаа өнгөрсөн. Тэр хэрээрээ иргэд биднээс шахаж, шаардаж байна. Энэ цаг мөчөөс төсөл  албан ёсоор хэрэгжиж  эхэллээ гэж ойлгож байна”гэсэн.

     “Ппэйч Мэлиорекс” компанийн   гүйцэтгэх захирал Михал Вашениук  “Эрдэнэт хотод хэрэгжүүлж байгаа энэхүү төсөл маань Монгол Улсад хэрэгжүүлж байгаа бидний анхны төсөл. Энэ төслийг үр дүнтэй хэрэгжүүлэх нь бидний дараа дараагийн хамтын ажиллагаанд их чухал. Дэлхий нийтээр бид хүнд үеийг давлаа. Одоо ч гэсэн цаг үеийн байдал тийм ч таатай биш байна. Өмнө нь нэг удаа гэрээг сунгасан. Дахин гэрээ сунгах тухай асуудал яригдахгүй заасан хугацаанд төслийг амжилттай хэрэгжүүлж дуусгана гэсэн төлөвлөгөөтэй байна” гэлээ.  Төслийн хүрээнд Хог хаягдал боловсруулах үйлдвэр байгуулахаас гадна хог дарж устгах ландфиллийн талбайг хөгжүүлэх, татан зайлуулах тоног төхөөрөмж зэргийг нийлүүлж,түлхүүр гардуулах нөхцөлтэйгөөр гэрээг үзэглэсэн.    

  Ирэх зургадугаар сар гэхэд тоног төхөөрөмж бүрэн нийлүүлэгдэж дуусна гэх мэдээллийг тус компанийн удирдлагууд өгч байна.“Мэлиорекс” компани  туслан гүйцэтгэгч компаниараа орон нутгийн “СОКОЛЬ” ХХК-ийг шалгаруулжээ.  Төслийн ажил эхэлсэн учир ажлын хэсэг байгуулж, холбогдох асуудлуудаа хэлэлцэн шийдвэрлэж явах нь зүйтэй гэж үзсэнээр энэ удаагийн талуудын уулзалт өндөрлөлөө.