Засаг дарга С.Батжаргал НҮБ-ын Хүүхдийн сангийн Шадар суурин төлөөлөгч Аяако Кайнотой хамтын ажиллагааны талаар санал солилцлоо

Засаг дарга С.Батжаргал НҮБ-ын Хүүхдийн сангийн Шадар суурин төлөөлөгч Аяако Кайног өнөөдөр хүлээн авч уулзан хамтын ажиллагааны талаар санал солилцлоо. Уулзалтын эхэнд хатагтай Аяако Кайно НҮБ-ын Хүүхдийн сангийн үйл ажиллагаа,цаашид анхаарч ажиллах асуудлынхаа  талаар мэдээлэл өгсөн.  НҮБ-ийн Хүүхдийн сан ирэх таван жилд хэрэгжүүлэх үйл ажиллагааныхаа төлөвлөгөөг энэ цаг үед боловсруулж байгаа аж.  Ирэх есдүгээр сард батлагдах  уг төлөвлөгөөнд хэд хэдэн шинэ зүйлсийг тусгаж анхаарч  ажиллахаар төлөвлөж буй   талаараа ч дурдсан. Өмнөх жилүүдэд нэг аймаг орон нутгийг сонгон авч хөтөлбөр хэрэгжүүлдэг байсан бол  энэ жилээс  аль нэг аймгийг сонгохгүйгээр үндэсний хэмжээнд хөтөлбөрөө хэрэгжүүлэхээр болжээ.

    НҮБ-ын Хүүхдийн сангийн нөөц боломжийг хүртээмжтэй, ухаалгаар зарцуулахын тулд тухайн орон нутагт тулгамдаж  буй асуудал, хэрэгцээ, шаардлагыг юун түрүүнд сонсож, мэдэх нь хамтын ажиллагаанд илүү  дөхөм гэдгийг  НҮБ-ын Хүүхдийн сангийн Шадар суурин төлөөлөгч Аяако Кайно онцолж байв.

     Засаг дарга С.Батжаргал  НҮБ-ын Хүүхдийн сантай өргөн хүрээнд хамтран ажиллах хүсэлтэй байгаагаа илэрхийлэн, хүүхэд хамгааллын чиглэлээр хийж хэрэгжүүлж буй ажил, тулгамдаж буй асуудлын талаар мэдээлэл өгсөн. Тэрээр “Орхон аймаг хүн амын төвлөрөл их, шилжилт хөдөлгөөн ихтэй байдаг учраас тэр хэрээрээ хүн амын өсөлт ихтэй аймаг. Нийт 29 мянган өрхийн 60 орчим хувийг гэр хорооллын айл өрх эзэлдэг. Иргэдийн амьдралын чанар харилцан адилгүй байгаатай холбоотойгоор хүүхдүүдийн боловсролын хүртээмж тэгш бус байна.  Мөн хүүхэд эцэг эхийн зан үйл, ажил, амьдралын байдалтай холбоотойгоор бие мах бод сэтгэл санааны хохиролд өртөх, гэмт хэргийн хохирогч болох эрсдэл өндөр байдаг. Үүнээс сэргийлж хүүхэд хамгааллын чиглэлээр цагдаа болон бусад холбогдох байгууллагуудтай хамтран багагүй ажлыг хийж байна. Гэсэн ч гэлээ бидэнд хийх анхаарах ажил их байгаа учир хүүхэд хамгааллын чиглэлээр НҮБ-ын Хүүхдийн сантай өргөн хүрээнд хамтран ажиллах хүсэлтэй” байна гэлээ.

Монгол дахь НҮБ-ын Хүүхдийн Cан нь Өсвөр үе, Хүүхэд хамгаалал, Боловсрол, Эрүүл мэнд, Ус ариун цэвэр, эрүүл ахуй, Хүрээлэн буй орчин, агаарын бохирдол гэх мэт 10 гаруй  хөтөлбөр хэрэгжүүлдэг. Ирэх таван жилийн төлөвлөгөөндөө Өсвөр үе залуучуудын шийдвэр гаргалтад нөлөөлөх, Цахим орчны хүчирхийлэлд өртөхөөс сэргийлэх, Бага насны хүүхдийн эрүүл мэнд, Засгийн газраас хэрэгжүүлж буй цахим шилжилтийн бодлоготой холбоотойгоор бүх салбарт хамтарч ажиллах зэргийг  онцгойлон  тусгасан байна. Түүнчлэн  Эрүүл мэндийн хөтөлбөрийн хүрээнд Эрүүл мэндийн анхан шатны тусламж үйлчилгээг сайжруулах, Олон нийтийн эрүүл мэндийн ажилтны оролцоог нэмэгдүүлэх, Дархлаажуулалтын чанарыг сайжруулах, бага насны хүүхдийн өсөлтийг дэмжихэд нэлээдгүй анхаарч ажиллахаар төлөвлөжээ.

Орхон аймгийн хийж хэрэгжүүлэхээр зорьж буй нэлээдгүй  зорилт  НҮБ-ын Хүүхдийн сангийн хөтөлбөрт тусгагдаж, нийцэж байгаа учир талууд Цахим шилжилт, Олон нийтийн эрүүл мэндийн ажилтныг нэмэгдүүлэх, Өсвөр үеийнхний сэтгэцийн эрүүл мэндийг хамгаалах, дэмжих, Боловсролын хүртээмжийг тэгш хүртээх гэх мэт хэд хэдэн чиглэлээр хамтарч ажиллахаар санал нэгдлээ.

Тухайлбал, Эрүүл мэндийн яамнаас Нийгмийн эрүүл мэндийг дэмжих төвийг гурван аймагт  байгуулахаар болсны нэг нь Орхон аймаг. Өвдсөний дараа биш өвчлөхөөс өмнө урьдчилан сэргийлэхэд анхаарах нь тус төвийн зорилго.  Тиймээс НҮБ-ын Хүүхдийн Cангийн Эрүүл мэнд хөтөлбөрт тусгасан Олон нийтийн эрүүл мэндийн ажилтныг нэмэгдүүлэх зорилтыг хэрэгжүүлэхэд хамтарч ажиллах нь тус төвийн үйл ажиллагаа, үндсэн чиг үүрэгтэй нийцэж байгааг уулзалтад оролцсон холбогдох албаныхан онцолсон.