Хүүхдийн эрхийн хууль зүйн хороо хуралдлаа

Хүүхдийн эрхийн хууль зүйн хороо өнөөдөр хуралдаж өнгөрсөн онд хийж хэрэгжүүлсэн ажлын тайлан болон энэ онд хийхээр төлөвлөсөн ажлын төслөө хэлэлцлээ.   Аймгийн Засаг даргын захирамжаар    16 хүний бүрэлдэхүүнтэй байгуулагдсан тус хороо нь  гэмт хэрэг зөрчилд холбогдсон хүүхдүүдэд үйлчилгээ үзүүлэх зорилготой  юм. Тус хороог Засаг даргын орлогч А.Түвшинжаргал ахалдаг бөгөөд аймгийн Гэр бүл хүүхэд залуучуудын хөгжлийн газар,  Эрүүл мэнд, Боловсрол, Хөдөлмөр халамж үйлчилгээний газар, цагдаа, прокурор зэрэг  байгууллагын холбогдох албан тушаалтнууд  бүрэлдэхүүнд багтдаг. 

  Хүүхэд оролцсон гэмт хэргийг  өмнөх оны мөн үетэй харьцуулахад гэр орон сууцанд 3 хэрэг бүртгэгдэж өмнөх оны мөн үеэс нэг хэргээр буюу 50 хувиар буурсан байна. Гудамж, талбайд 5 хэрэг бүртгэгдэж өмнөх оны мөн үеэс 1 хэргээр буюу 25 хувиар өссөн дүнтэй байна.

   Ерөнхий боловсролын сургуулийн орчинд үе тэнгийн дарамт үзүүлдэг хүүхдийн судалгааг өнгөрсөн онд авахад  52 хүүхэд бүртгэгджээ.  Сургуулийн орчинд үе тэнгийн хүүхдүүдтэй зодоон  зөрчилдөөн үүсгэдэг, бусдыг өдөөн турхирдаг, гэмт хэрэг зөрчилд бусдыг уруу татдаг  гэх мэт зан үйлийг нь өөрчлөх шаардлагатай  гэж үзэж  энэ онд  “Үе тэнгийн дээрэлхлийг бууруулах” зорилт тавиад байна.

   Уг зорилтын хүрээнд мэргэжлийн чиг баримжаа олгох сургалтад хамруулах, хууль зөрчсөн хүүхдийн эцэг эх асран хамгаалагч, харгалзан дэмжигчийг нь ажил мэргэжилтэй болоход дэмжлэг үзүүлэх, хичээлийн хоцрогдолтой хүүхдүүдийн хичээлийн хоцрогдлыг арилгах сургалтад хамруулах, 2022 оныг “Ёс зүйн жил” болгосонтой холбогдуулан хүчирхийллийг үл тэвчих соёлтой сургуулийг бий болгох юм.

   Үүний үр дүнд хүүхэд хүмүүжлийн эерэг аргад эцэг, эх асран хамгаалагчид суралцах, гэмт хэрэг зөрчлийн тоо  буурах, үе тэнгийн дээрэлхэл, дарамт буурна гэж үзэж байна.

   Тухайлбал, 52 хүүхдийн зан төрхийг засан сайжруулах, амьдрах ухааны чадварт суралцуулах бүлгийн хөтөлбөрт хамруулж 180-250 гэр бүлийн гишүүдэд сэтгэцийн эрүүл мэндийн эмчилгээ хийж, сэтгэл зүйн эрүүл мэндийн боловсролыг олгох юм. Гэр бүлийн гишүүн бүр сэтгэл зүйн хөтөлбөрт хамрагдсанаар харилцан үр дүн өндөр байж, гэр бүлийн хүчирхийлэл буурч, гэмт хэргээс урьдчилан сэргийлэх юм.