асаг даргын шуурхай хуралдаанаар х

Засаг даргын шуурхай хуралдаанаар хаврын тариалалтын бэлтгэл ажил эхэлсэнтэй холбогдуулан Хүнс, хөдөө аж ахуйн газрын дарга Ж.Бат-Өлзий цаг үеийн асуудлаар мэдээлэл өгөв.

  Засгийн газраас хүнсний хэрэгцээгээ дотооддоо хангах зорилгоор Атрын-IV аяныг эхлүүлж буй. Үүний хүрээнд өрхийн тариаланчдад болон төмс хүнсний ногоо тариалах чиглэлээр үйл ажиллагаа явуулж буй аж ахуйн нэгжид тодорхой дэмжлэгийг үзүүлэхээр болсон байна.

  Тодруулбал, ноолуур бэлтгэл үйлдвэрлэл, үр тариа хаврын тариалалт, төмс хүнсний тариалалтад, ноос бэлтгэл, арьс шир үйлдвэрлэл, гурил тэжээл ургамлын тосны үйлдвэрлэлтэд нэг жилийн хугацаатай гурван хувийн хүүтэй зээлийг арилжааны банкуудаар олгох юм байна.  Засгийн газраас зээлийн хүүгийн дэмжлэг үзүүлэх ажээ. Аймгийн Хүнс хөдөө аж ахуйн газар бүртгэлтэй 34 аж ахуйн нэгж, 830 иргэний холбогдох материал, нэрсийн жагсаалтыг салбар яам болон Монгол банкаар дамжуулан арилжааны банкуудад хүргүүлсэн байна.

  Мөн хүнсний ногооны тариалан эрхлэгчдийн тухайн жилийн ургацаас зах зээлд борлуулсан стандартын шаардлага хангасан хүнсний ногоонд тонн тутамд 100 мянган төгрөгийн урамшуулал олгох журмыг баталжээ. Үүнд, үндэст урт ногоо, навчит ногоо, хүлэмжийн үндсэн таримал болох лооль, өргөст хэмх, чинжүү зэрэг ногоо орох аж.

Энэ жил Орхон аймаг 5576 га талбайд тариалалт, 3850 га талбайд уринш хийнэ. Үр тарианы тариалан эрхлэгчид тариалалтын бэлтгэл ажилдаа орсон бол төмс хүнсний ногооны тариалан эрхлэгчид талбайд бууц татах, үрсэлгээ хийх ажил эхэлсэн байна.