2022 оны шилдгийн шилдэг эмчээр БОЭТ-ийн Төрөх тасгийн эрхлэгч Б.Эрдэнэбулган шалгарч, "Эрдэнийн чагнуур"-ын эзэн боллоо

Дэлхийн эмч нарын өдөр” жил бүрийн гуравдугаар сарын 30-нд тохиодог. Цар тахалтай тэмцсэн хоёр жилийн дараа эмч нар өнөөдөр баярын хурлаа хийлээ.  Хуралд Засаг даргын орлогч А.Түвшинжаргал, Эрүүл мэндийн газрын дарга Д.Сүхээ, БОЭТ-ийн захирал Ц.Наран-Эрдэнэ нар болон эрүүл мэндийн салбарт ажиллагсад оролцлоо.  2022 оны шилдгийн шилдэг эмчид дөрвөн эмч нэр дэвшсэнээс  БОЭТ-ийн Төрөх тасгийн эрхлэгч Б.Эрдэнэбулган шалгарч “Эрдэнийн чагнуур”-ын эзэн болов. 

Мөн эмч, эмнэлгийн байгууллагын ажилтнууд баярын өдрөө угтан эрдэм шинжилгээний хурал зохион байгуулж, амжилттай оролцсон эмч нарт шагнал гардуулсан юм. 

Эмнэлзүйн төрөлд:

I байр-Бүсийн эмчилгээний төвийн коронавируст халдварын тохиолдлоор хэвтсэн эмчлүүлэгчдийн дунд хийсэн судалгаа” сэдвээр оролцсон БОЭТ-ийн эмч Ц.Саранцэцэг, 

II байр-Өндөр давтамжит радио долгоиноор шамбарам түлэх эмчилгээний эмнэлзүйн тохиолдлуудын эрт үеийн үр дүн” сэдвээр оролцсон Медипас эмнэлгийн эмч З.Сонор, 

III байр- “Орхон аймгийн элэгний хатууралтай өвчтөнүүдийн дундах улаан хоолойн вариказын анхдагч урьдчилан сэргийлэх эмчилгээнд хамрагдсан байдал” сэдвээр оролцсон Медипас эмнэлгийн эмч З.Болормаа, 

Нийгмийн эрүүл мэндийн төрөлд:

I байр-“Орхон аймгийн эмэгтэйчүүдийн урьдчилан сэргийлэх үзлэгээр хүний хөхөнцөр вирусийн тархалт болон түүний өвчлөлд нөлөөлөх хүчин зүйлийг судлах нь” сэдвээр оролцсон Медипас эмнэлгийн эмч Г.Баянжаргал,

II байр-“Орхон аймагт бүртгэгдсэн коронавируст халдварын PCR шинжилгээгээр батлагдсан тохиолдлын дархлаажуулалтын байдалд хийсэн судалгаагаар оролцсон Эрүүл мэндийн газрын мэргэжилтэн П.Отгонбилэг, 

III  байр-“Орхон аймгийн эмэгтэйчүүдийн дундах умайн хүзүүний эсийн шинжилгээний талаарх мэдлэг, хандлага, мэдлэгт нөлөөлөх эрчим хүчин зүйл” сэдвээр оролцсон Бүсийн оношилгоо эмчилгээний төвийн эмч Х.Нандинцэцэг, 

Тусгай байрт “Чихрийн шижингийн шалтгаант бөөрний архаг авчин ба түүний эрсдэлд хүчин зүйлс хоорондын хамаарлыг харьцуулан судалсан нь” сэдвээр Х.Хулан, "Өсвөр насны сурагчдын сэтгэл гутрал, өөртөө итгэх итгэл, стрессийн түвшин болон цахим хэрэглээний байдлыг судалсан нь” сэдвээр оролцсон ЭМГ-ын сэтгэл зүйч Г.Буднаа, Баян-Өндөр мед эмнэлгийн эмч Т.Цэрэнтогтох  нар шалгарсан. 

Мөн энэ үеэр “Эрүүлийг хамгаалах тэргүүний ажилтан” хүндэт тэмдгээр ЭМГ-ын дарга Д.Сүхээ,БОЭТ-ийн Мэдрэлийн тасгийн их эмч М.Баяржавхаа, Нярайн тасгийн их эмч А.Намжилмаа нарын 11 хүн шагнагдсан бол салбар яамны Жуух бичиг, аймгийн ИТХ, Засаг даргын  шагнал зэргээр нийт 20 орчим хүн шагнууллаа.