"Дэлхийн эмч нарын өдөр"-ийг тохиолдуулан эмч нар баярын хурлаа хийлээ

Аймгийн ЗДТГ,  БОЭТ-өөс “Дэлхийн эмч нарыг өдөр”-ийг тохиолдуулан өнөөдөр баярын хурал зохион байгууллаа. Засаг даргын орлогч А.Түвшинжаргал, Эрүүл мэндийн газрын дарга Д.Сүхээ, БОЭТ-ийн захирал Ц.Наран-Эрдэнэ нар нийт эмч сувилагч нарт хандаж мэндчилгээ дэвшүүлэв. 

Аймгийн Засаг даргын орлогч А.Түвшинжаргал арга хэмжээг нээж үг хэлсэн үгэндээ “Цар тахалтай нүүр тулсан хүндхэн хоёр жилийг бид өнгөрөөлөө. Энэ хоёр жил биднийг шалгасан, сандаргасан,сургасан он жилүүд байлаа. Анхны тохиолдол бүртгэгдсэн тэр өдрөөс хойш хамтдаа хүнд хэцүүг үүрч өдий хүрсэн. Энэ цаг хугацаанд ур чадвараа дайчлан ажилласан Нийгэм бодлогын хэлтсийн хамт олон, Нийгмийн эрүүл мэндийн төвийн хамт олон, БОЭТ, Эрдэнэт сувилал, хувийн хэвшлийн эмнэлэгүүдэд, Өрхийн эрүүл мэндийн эмч, сувилагч нартаа нийт Эрдэнэтчүүдийнхээ нэрийн өмнөөс дахин талархал илэрхийлье. Мөн энэ хугацаанд хоёр гавъяат, 50 гаруй төрийн одон медальтан, 60 гаруй салбарын шагналтууд тодорчээ. Нийт эмнэлгийн ажиллагсдын 60 гаруй хувьд нь эд материалын болон сэтгэл санааны дэмжлэг үзүүлсэн байна.  Хэцүү цаг үед бодит дэмжлэг үзүүлж, удирдлагаар хангаж байсан Засаг дарга С.Батжаргал таньд Та бүгдийн нэрийн өмнөөс талархал илэрхийлье. Хүний амь нас эрүүл мэнд юугаар ч сольшгүй. Та бүгдийн эзэмшсэн мэргэжил сурсан зүйл Монгол түмний, Эрдэнэтчүүдийн бахархал юм” гэлээ. 

Өнгөрсөн он жилүүдэд аймаг орон нутгаас 13 тэрбум төгрөгийн хөрөнгө оруулалтыг эрүүл мэндийн салбарт оруулснаас найман 8 тэрбум төгрөгийг ковид цар тахалд зарцуулжээ. 2016-2020 онд Засаг даргын үйл ажиллагааны мөрийн хөтөлбөр бүрэн хэрэгжиж, БОЭТ-ийг сайжруулж тоног төхөөрөмжөөр хангаж, эмч нараа ажлын байран дээрээ сургаж дотоод, гадаадад туршлага судлуулж байсны үндсэн дээр цар тахлыг  хохирол багатай даван туулсан гэдгийг Засаг даргын орлогч А.Түвшинжаргал онцолж байв. 

Эрүүл мэндийн газрын дарга Д.Сүхээ “БОЭТ-өөс ажил хөдөлмөрөө эхлүүлсэн эрүүл мэндийн салбарын үе үеийн ахмад эмч, эх орныхоо өнцөг булан бүрт ажиллаж байгаа эмч нартаа баярын мэнд дэвшүүлье. 2020-2022 оны коронавируст халдварын нөхцөл байдал, 2021-2022 онд тохиолдсон цар тахлын 4 давлагаанаас улбаалж 2020 2021 онд та бид "Эмч нарын өдөр"-ийг тэмдэглэлгүй алгассаны эцэст энэ онд баярын өдрөө хамтдаа тэмдэглэж байгаа билээ Цар тахлын энэхүү хүнд давлагаанууд манай мэргэшсэн эмч, залуу эмч, резидент эмч нарын ур чадвар, өргөсөн тангарагтаа хэр үнэнч болохыг шалгасан томоохон сорилт болсон бөгөөд Монголын нийт эмч эрүүл мэндийн бусад ажилтны хамт энэхүү давлагаануудыг үлгэр жишээчээр амжилттай даван туулж, ард олноосоо талархал хүлээж, хүндлэгдэж байгаа нь үнэхээр бахархууштай байна” гэлээ. Харин БОЭТ-ийн захирал Ц.Наран-Эрэнэ “Цар тахлын хүнд хэцүү цаг үед өргөнсөн тангарагтаа үнэнч байж тэргүүн эгнээнд зогссож хариуцлагатай нэр төртэйгөөр ажилласан эмч нараараа бахархаж байна. Та бүхний ард зүтгэсэн гэр бүлийнхэнд тань халуун баяр хүргэе”  гэлээ. 

Аймаг, орон нутгийн төсвөөс эрүүл мэндийн салбарт онцгой анхаарсны үр дүнд өнөөдөр БОЭТ-ийн Яаралтай түргэн тусламжийн төв шаардлагатай бүх тоног төхөрөөмжөөр хангагджээ. Мөн мэс заслын болон бусад тоног төхөөрөмжийг ариутгах ариутгалын кабинеттэй болсон байна.  Түүнчлэн 39 жилийн насжилттай сантехникийг шинэчилсэн,эмнэлгийн тусламж үйлчилгээ, компьютер томограф, судсан дотуурх оношилгоо эмчилгээ, судсан дотуурх мэс засал, ходоод, нарийн гэдэсний дуран, чих хамар хоолойн дуран, дижитал, рентгенээр бүрэн хангагдсан талаар эмч, эмнэлгийн ажилтнууд онцоллоо.