"Эрүүл хүүхэд", "Хүүхэд хөгжил", "Тэгш боломж" төслийг хэрэгжүүлнэ

Аймгийн Засаг даргын зөвлөлийн өчигдрийн  IX дэх удаагийн хуралдаанаар Боловсрол, шинжлэх ухааны газар Нийгмийн бодлогын хэлтсээс “Эрүүл хүүхэд”, “Хүүхдийн хөгжил”, Хөгжлийн бэрхшээлтэй хүүхдийг боловсролд хамруулах “Тэгш боломж” зэрэг төслүүдийг оруулж  хэлэлцүүлсэн. Уг төслүүдийн талаарх мэдээллийг товчоор бэлтгэлээ.

“Эрүүл хүүхэд” төсөл:

-Өнгөрсөн онд Орхон аймгийн ерөнхий боловсролын сургуулийн сурагчдын дунд хийсэн судалгаагаар хоол боловсруулах эрхтэн тогтолцооны болон амьсгалын замын халдварт өвчний тархалт өндөр,  нийт сурагчдын 34,7 хувь буюу 50 хувь нь жингийн илүүдэлтэй гэж гарсан байна. Мөн  4000 гаруй сурагчдаас сэтгэл санааны болон сэтгэл зүйн судалгаа авахад 10 сурагч тутмын 3 нь сэтгэл зүйн дарамттай гэж дүгнэгджээ. Ерөнхий боловсролын сургуулиудад эрүүл мэндийн хичээл ордог ч хангалтгүй байгаа талаар албаныхан хэлж байна. Эрүүл мэндийн  хичээл орж буй багш нараас авсан судалгаанаас харахад  37.5 хувь нь мэргэжлийн бус багш байгаа аж. Дээрх судалгаануудын дүгнэлтээс харахад ерөнхий боловсролын сургуулийн сурагчид бие болоод сэтгэл санааны хувьд ямар эрсдэлд байгааг харуулж байна. Тиймээс эрүүл мэндийн хичээл орж буй багш нарыг чадавхжуулах, сургалтад хамруулж  эрүүл мэндийн кабинет зэргийг уг  төслөөр тохижуулах юм.

“Хүүхэд хөгжил” төсөл:

-Уг төслөөр дамжуулан сурагчдыг  уран зохиол, дуу хөгжим, техник технологи бие бялдрын чиглэлээр хөгжүүлнэ.  Төрийн өмчийн 17 сургуулийн биеийн тамир, хөгжим, дүрслэх урлаг, технологи, монгол хэл уран зохиолын багш нар уг төсөлд хамрагдаж, багш нарыг чадавхжуулах сургалтыг ирэх саруудад зохион байгуулахаар төлөвлөжээ. Засаг даргын орлогч М.Түвшинжаргал уг төслийг дэмжиж  байгаагаа илэрхийлээд хүүхдүүд сошиал орчинд чөлөөт цагаа өнгөрөөх болсон энэ үед хөгжмийн боловсролыг хүүхдүүдэд олгох нь их зөв  хэмээн сайшаав.  Засаг дарга С.Батжаргал “Сургууль хүүхдийн айдсын орчин байх учиргүй. Багшаасаа айдаг байх ёсгүй. Даалгавар хийгээгүйгээсээ болж багш юу гэх бол гэсэн байдастай хичээлдээ явдаг байж болохгүй. Сургууль хүүхдийн хүслийн газар байх ёстой. Ер нь өнөөдөр боловсролын байгууллагын тогтолцоо хүүхдийн хөгжил ярихаас илүүтэй барилгын засвар, сантехникийн засвар ярьдаг болсон. Барилга барьснаа боловсролын байгууллага сайн ажиллаж байна гэж ярьдаг. Үндсэн өөрийнх нь хүлээсэн агуулга байхгүй болчихсон. Энэ орж ирж байгаа төслүүдийг хараад байхад амьдрал дээр ярьдаг зүйлсийг оруулж ирж байгаа нь зөв. Гэхдээ цаасан дээр буулгахдаа шинжлэх ухаанч судалгаатай байх ёстой” гэсэн.

Хөгжлийн бэрхшээлтэй хүүхдийг боловсролд хамруулах “Тэгш боломж” төсөл:

-Орхон аймагт хөгжлийн бэрхшээлтэй 4200 гаруй иргэн бий. 0-3 насны 393, байнгын асаргаатай 348, сургуульд сурдаггүй 72 хүүхэд бий гэсэн тоон мэдээ байна. 2017 онд төрсөн өнгөрсөн есдүгээр сард нэгдүгээр ангид элсэн суралцах ёстой байсан 35 хүүхдийн 12 нь сургуульд элсэн суралцаж байгаа бол үлдсэн нь сургуульд ороогүй байна.  Ерөнхий боловсролын VII сургуульд 6-16 насны 46 сурагч, 27 болон VII цэцэрлэгийн дөрвөн бүлэгт 2-6 насны 30 орчим хүүхэд суралцаж байгаа аж. Орхон аймагт хөгжлийн бэрхшээлтэй хүүхдийг дэмжих дөрвөн төв ажиллаж, үүнд 86 хүүхэд хамрагдаж байна. Төслийн хүрээнд Ерөнхий боловсролын гурван сургуульд хөгжлийн бэрхшээлтэй хүүхдийг дэмжих жишиг танхим байгуулах юм. Сургуулиудыг сонгохдоо дэд бүтэц, барилгын стандарт, байршил зэргийг харгалзан үзэж ерөнхий боловсролын   I,VII, XX  сургуулийг сонгожээ.