Аймгийн Засаг даргын зөвлөлийн IX дэх хуралдаан боллоо

Аймгийн Засаг даргын зөвлөлийн  IX дэх удаагийн хуралдаанаар найман асуудал хэлэлцлээ.

Тодруулбал, аймгийн Жижиг дунд үйлдвэрийг хөгжүүлэх, тэргүүлэх чиглэл батлах тухай, “Эрдэнэт сан”-гийн журмын төсөл, Эрүүл хүүхэд, Хүүхдийн хөгжил, Хөгжлийн бэрхшээлтэй хүүхдийг боловсролд хамруулах “Тэгш боломж” төсөл, БОЭТ-ийн дэргэдэх “Хөтөч брэнд” төслийн талаарх танилцуулга, Засаг даргын нөөц  сангийн зарцуулалтын талаар зөвлөлийн гишүүд хэлэлцэв.

Аймгийн жижиг дунд үйлдвэрийг хөгжүүлэх, тэргүүлэх чиглэл батлах тухай журмыг зөвлөлийн хурлын эхэнд хэлэлцүүллээ.

Өнөөдрийн байдлаар Орхон аймагт 74 хоршоо байгаагийн 23 нь тогтвортой үйл ажиллагаа явуулж байгаа аж.  Иргэдээс  өнгөрсөн нэгдүгээр сард  хоршооллыг дэмжих саналыг цахим болон цаасан хэлбэрээр авчээ. Уг санал дээр үндэслэн өнөөдрийн хуралдаанд  мал аж ахуй, газар тариалан, хөнгөн үйлдвэр, сүү, сүүн бүтээгдэхүүн боловсруулалт, өвөл зуны хүлэмж, малын тэжээл гэх мэт 27  чиглэлийг тэргүүлэх салбар болгосноо танилцуулав. 

Засгийн газрын 2021 оны 5 сарын 8-ний өдрийн тогтоолоор  Сум хөгжүүлэх сангийн нэршлийг хоршоолол болгож өөрчилсөн. Үүнтэй холбоотой холбогдох журмыг 2021 оны дөрөвдүгээр улиралд багтааж батлах чиглэл  өгсний дагуу Монгол Улсын бодлого чиглэл хоршооллыг хөгжүүлэхэд чиглэсэн.

2013 оноос Сум хөгжүүлэх сангийн зээлийг иргэн, аж ахуйн нэгж байгууллагад олгож эхлэхдээ иргэнд 10 сая, аж ахуйн нэгжид 15 сая төгрөгийн зээл олгодог байв.  Тэгвэл уг журамд  өөрчлөлт оруулж иргэнд зээл олгохгүйгээр хоршоололд зээл олгодог байхаар  өөрчилсөн. Өөрөөр хэлбэл, иргэд нэгдэж хамтарч ажиллах нь бодит үр дүнд хүрнэ гэж үзсэн байна. Идэвхтэй үйл ажиллагаа явуулж байгаа хоршоодод хөнгөлөлттэй зээл олгосноор ажлын байр нэмэгдүүлэх, амьжиргаа сайжруулах, орон нутгийн тогтвортой хөгжлийг хангана гэж үзэж байна. 

 Өмнө нь олгосон зээлийн 30 хувь нь эрсдэлтэй гэж дүгнэгдсэн нь журамд өөрчлөлт оруулахад  нөлөөлсөн гэх мэдээллийг холбогдох албаныхан  өглөө.

Дараагийн хэлэлцүүлсэн асуудал нь Боловсрол, шинжлэх ухааны газар Нийгмийн бодлогын хэлтсээс оруулж ирсэн “Эрүүл хүүхэд”, “Хүүхдийн хөгжил”, Хөгжлийн бэрхшээлтэй хүүхдийг боловсролд хамруулах “Тэгш боломж” зэрэг төслүүд байв.  Дээрх төслүүдийг цаг үеэ мэдэрсэн нэн чухал шаардлагатай төсөл болохыг аймгийн Засаг дарга С.Батжаргал онцолсон.  

 

ЕБ-ын сургуулиуд эрүүл мэндийн  хичээлийг  судалдаг  ч багш нарын бэлтгэсэн байдлаас улбаатайгаар харилцан адилгүй байна.  Хичээл орж буй багш нараас судалгаа авахад 37,5 хувь нь мэргэжлийн бус багш байна гэх мэдээллийг Боловсрол, шинжлэх ухааны газрын Байгалийн ухааны сургалт хариуцсан мэргэжилтэн Г.Мөнхзул  “Эрүүл хүүхэд”  төслийн танилцуулгадаа дурдав.

2021 онд сурагчдын дунд хийсэн судалгаагаар хоол боловсруулах эрхтэн тогтолцооны болон амьсгалын замын халдварт өвчний тархалт өндөр, нийт сурагчдын 34,7 хувь буюу 50 хувь нь жингийн илүүдэлтэй, аймгийн 21 ерөнхий боловсролын сургуулийн 4000 гаруй сурагчдаас сэтгэл санааны болон сэтгэл зүйн судалгаа авахад 10 сурагч тутмын 3 нь сэтгэл зүйн дарамттай гэсэн дүгнэлт гарчээ.  Уг судалгааны дүн ерөнхий боловсролын сургуулийн сурагчид бие болоод сэтгэл санааны хувьд ямар эрсдэлд байгааг илтгэж буй учир “Эрүүл хүүхэд” төслийг хэрэгжүүлэх шаардлагатай гэж үзэж байна. 

 

“Эрүүл хүүхэд”  төсөл болон бусад төслийн талаар эргэн мэдээлэх болно.