Монгол Улсын гавьяат тамирчин Х.Батхишигийн нэрэмжит самбо бөхийн өсвөрийн улсын аварга шалгаруулах тэмцээн эхэллээ

Орхон аймгаас төрөн гарсан дэлхийн хошой аварга, Монгол Улсын гавьяат тамирчин Хүрэлдоржийн Батхишигийн нэрэмжит Самбо бөхийн өсвөрийн улсын аварга шалгаруулах тэмцээн өнөөдөр Орхон аймагт эхэллээ. 

Тэмцээний нээлтэд  Засаг дарга, аймгийн Самбо бөхийн холбооны тэргүүн С.Батжаргал, Монголын самбо бөхийн холбооны ерөнхийлөгч Д.Гэрэл, Дэлхийн хошой аварга, Монгол Улсын гавьяат тамирчин  Х.Батхишиг, Булган аймгийн Засаг дарга, Монголын  самбо бөхийн холбооны нарийн бичгийн дарга Б.Ариун-Эрдэнэ,  аймгийн Биеийн тамир спорт газрын дарга Д.Дэлгэрбаяр,  Юнайтед Белаз ХХК-ны ерөнхий захирал, самбо бөхийн холбооны түнш Леонид Яковлевич  болон  тив дэлхийн тэмцээнээ эх орныхоо нэрийг дуурсгасан үе үеийн тамирчид оролцлоо.

Засаг дарга С.Батжаргал “Эх орныхоо нэрийг дэлхийн тавцнаа дуурсган алтан соёмбот төрийн далбаагаа мандуулан  төрийн дууллаа эгшиглүүлж ирсэн үе үеийн тамирчид, дасгалжуулагчид Та бүхнээрээ энэ өдөр  бахархаж байна.  Орхон аймагт зохион байгуулж буй өсвөрийн улсын аварга шалгаруулах тэмцээний ялагчид тив дэлхиййн дэвжээнд од болон гялалзахын ерөөл дэвшүүлье. Цар тахлын дараа зохион байгуулж  буй улсын чанартай анхны томоохон тэмцээнд тамирчид өргөн бүрэлдэхүүнээрээ оролцож байна. Самбо бөхийн өсвөрийн улсын аварга шалгаруулах энэ удаагийн тэмцээнийг   дэлхийн хошой аварга, Монгол Улсын гавьяат тамирчин Хүрэлдоржийн Батхишигийн нэрэмжит болгон зохион байгуулж байгаа нь аймгаасаа төрөн гарсан гавьяат тамирчдаа танилцуулах, алдаршуулах зорилготой юм. Нийт баг тамирчдад амжилт хүсье” гэлээ.

 Дэлхийн хошой аварга, Монгол Улсын гавьяат тамирчин  Х.Батхишиг:

-“2022 оны өсвөрийн самбо бөхийн улсын аварга шалгаруулах тэмцээн Орхон аймагт тэр тусмаа миний нэрэмжит болон зохион байгуулагдаж байгаад туйлын таатай байна. Миний бие 1993 оноос самбо бөхөөр хичээллэж, 2000, 2001 онд Азийн аварга, дэлхийн хошой аварга болсон амжилтыг үзүүлсэн нь  тамирчин хүний нөр их хөлс хөдөлмөр, тэсвэр тэвчээрийн үр дүн юм. Тэмцээнд оролцож байгаа нийт тамирчдадаа амжилт хүсье. 

Монголын самбо бөхийн холбооны ерөнхийлөгч Д.Гэрэл:

-Цар тахалтай байсан сүүлийн хоёр жил ямар ч тэмцээн уралдаан болсонгүй. Орхон аймагт 26,27-ны өдрүүдэд зохион байгуулж байгаа өсвөрийн улсын аварга шалгаруулах самбо бөхийн тэмцээн үүний салхийг хагалж байгаад сэтгэл хангалуун байна. Тэмцээнд 340 гаруй баг тамирчид оролцож байгаа нь ямар их хүлээлт байсны илрэл юм. Монгол Улс улс самбо бөхийн спортоор Азидаа төдийгүй дэлхийд дээгүүрт эрэмбэлэгддэг. Үүнийг би бардам хэлнэ.  Эндээс баг тамирчдын авхаалж, самбаа, чадвар чансаа ямар төвшинд байгааг  харж болно. Нийт тамирчдадаа амжилт хүсье. 

Орхон аймагт өмнө нь залуучуудын болон насанд хүрэгчдийн  самбо бөхийн улсын аварга шалгаруулах тэмцээн болж байсан бол өсвөрийн улсын аварга шалгаруулах тэмцээн анх удаа зохион байгуулагдаж байна.  Тэмцээнд 21 аймаг, нийслэл, дүүргээс 340 гаруй баг тамирчид оролцож хоёр өдрийн турш хүч үзнэ.

Мэдээллийн төв