Амралтын өдрүүдэд ухаалаг төлбөрийн систем нэвтрүүлсэн хоёр автобусыг туршилтаар явуулна

Орхон аймаг мэдээллийн технологийн хөгжингүй хот болох зорилгоор “Цахим Эрдэнэт-1” хөтөлбөрийг хэрэгжүүлж эхэлсэн.  Уг хөтөлбөрийн хүрээнд “СИМ” ХХК-ийн санхүүжилт, техник, технологийн шийдлээр нийтийн тээврийн үйлчилгээг цахимжуулах “EPASS” төслийг хэрэгжүүлж эхлээд байна.  

Уг төслийн хүрээнд нийтийн тээврийн төлбөрийн шийдлийг цахимжуулах, автобусны буудлууд дээр иргэн төвтэй ухаалаг самбарыг суурилуулах ажлыг цогцоор нь шийдвэрлэх юм. Ухаалаг самбарыг суурилуулснаар автобусны ирэх, явах хугацаа, чиглэлийн мэдээллийг зарлахаас гадна төрийн байгууллагын цаг үеийн мэдээллийг иргэд авах боломж бүрдэнэ. 

Зорчих карт нь энгийн, хүүхдийн,  хөнгөлөлттэй  гэсэн гурван төрөл байх бөгөөд хөнгөлөлттэй картаар оюутан, цагдаа, өндөр настан, хөгжлийн бэрхшээлтэй иргэд, ЕБС-ийн сурагчид  зорчих юм. 

Өнөөдрийн байдлаар хоёр аж ахуйн нэгжийн 30 гаруй автобус нийтийн тээврийн үйлчилгээнд явж байгаагийн  эхний ээлжийн  хоёр автобусанд карт унших төхөөрөмжийг суурилуулан энэ амралтын өдрүүдэд  туршиж үзэхээр болжээ. 

Төслийг хэрэгжүүлснээр нийтийн тээврийн үйлчилгээний чанар, хүртээмж, шуурхай байдал сайжирхын зэрэгцээ  Орхон аймаг нийтийн тээвэрт цахим шийдлийг хэрэгжүүлсэн анхны аймаг болж байна.