“Эх дэлхий” залуучуудын манлайллын хөтөлбөрийн нээлт боллоо

Дэлхийн байгаль хамгаалах сан (WWF)-аас уур амьсгалын өөрчлөлттэй тэмцэхэд хувь хүний ойлголтыг дээшлүүлж, оролцоог нэмэгдүүлэх зорилгоор “Эх дэлхийн цаг” хөтөлбөрийг 2007 оноос хойш хэрэгжүүлж эхэлсэн.   Дэлхий нийтийг хамарсан энэхүү арга хэмжээг жил бүрийн гуравдугаар сарын сүүлийн долоо хоногийн бямба гаригт тэмдэглэдэг бөгөөд  энэ жилийн хувьд энэ сарын  26-нд тохиож байна. 

 “Эх дэлхийн цаг” арга хэмжээний хүрээнд  хэрэгжүүлж буй “Эх дэлхий” залуучуудын манлайллын хөтөлбөрийн нээлт өнөөдөр боллоо. 

Нээлтэд, Орхон аймгийн Засаг даргын орлогч М.Түмэнжаргал, Сэлэнгэ голын сав газрын захиргааны дарга М.Чулуунзагд, БОАЖ-ын газрын дарга С.Жаргалсайхан нар болон манлайллын хөтөлбөрт шалгарсан 15-20 насны 20 орчим залуус оролцов.

Хөтөлбөрт хамрагдсан залуусаар дамжуулан  уур амьсгал, байгаль орчны талаар олон талын мэдлэг мэдээллийг хүргэснээр гэр бүл, найз нөхөд, анги хамт олондоо нөлөөлөх манлайлагчдыг  бэлтгэх зорилготой юм. 

Эрдэнэт хотод “Эх дэлхийн цаг” арга хэмжээг  анх  2017 онд Амарын талбайд зохион  байгуулж, 390 хүн оролцож  байжээ.  Үүнээс хойш жил бүр идэвхтэй оролцож ирсэн бөгөөд  коронавирусийн цар тахлын үед цахимаар зохион байгуулж 923.02 кВт/цаг эрчим хүч хэмнэн агаар мандалд дэгдэх байсан нүүрс хүчлийн хийг 738.4 гр-аар бууруулсан байна. 

Өнгөрсөн онд иргэд байгууллагуудын дунд уралдаан зарласнаас гадна өсвөр үе, залууст чиглэсэн  эх дэлхийгээ  хайрлан хамгаалахад ямар дадал хэвшлийг бий болгох талаар дөрвөн видео контент, Орхон аймгийн санаачилгаар анх удаа 10 аймгийн гэрэл унтарч буй бичлэгийг хийн Еarth Hour  Official  руу Дэлхийн байгаль хамгаалах сангаар дамжуулан илгээжээ. 

Энэхүү арга хэмжээг орон нутагтаа тогтмол зохион байгуулж эх дэлхий, байгаль орчноо хамгаалахад хүн бүр оролцож, бусад аймгуудаа уриалж хүрээг нь тэлэхэд тодорхой хувь нэмрээ оруулж ирсэн болохыг  Засаг даргын орлогч М.Түмэнжаргал онцолсон.  

 Ирэх бямба гариг буюу энэ сарын 26-нд айл өрх, албан байгууллагуудыг 20:30-21:30 ийн хооронд нэг цаг гэрлээ унтрааж “Эх дэлхийн цаг”т нэгдэхийг оролцогчид уриаллаа.