ЭРЧҮҮД НИЙГМИЙН ХӨГЖИЛД” АРГА ХЭМЖЭЭ БОЛЛОО

Монгол улсад Орчин цагийн зэвсэгт хүчин үүсч хөгжсөний 101 жилийн ойн энэ өдөр Орхон аймгийн Засаг даргын Тамгын газраас санаачлан “Эрчүүд нийгмийн хөгжилд” арга хэмжээг зохион байгууллаа. 

       Аймгийн ЕБС-ын ахлах ангийн сурагчид, хүчний байгууллага, төрийн байгууллага, иргэдийн төлөөлөл болсон 450 гаруй эрчүүд, аавууд оролцсон уг арга хэмжээг нээж ИТХ-ын дарга Д.Мөнхбат, Засаг дарга С.Батжаргал нар мэндчилгээ дэвшүүлж үг хэллээ. 

        Мөн аймгийн Засаг даргын орлогч, жендэрийн салбар хорооны дарга А.Түвшинжаргал “Нийгмийн хөгжилд эрэгтэйчүүдийн оролцоо, манлайлал, үнэ цэнэ” сэдвээр илтгэл танилцууллаа. Орхон аймгийн нийт хүн амын 49 хувийг эрчүүд эзэлдэг. Үүнээс цэргийн алба хаасан 21,000 эрэгтэйчүүд байдаг. Төрж буй хүүхдийн 52 хувь нь эрэгтэй боловч нас ахих тусам багасч 70-аас дээш насанд 450 хүнээр эмэгтэйчүүдээс зөрүүтэй болдог. Эрэгтэйчүүдийн нас баралтын тэргүүлэх шалтгаануудад зүрх судасны өвчлөл, осол гэмтэл, хавдар давамгайлж байна. Иймд эрт илрүүлэг, эрүүл мэндэд анхаарах, эрэгтэйчүүдийн кабинетийн хүртээмжийг нэмэгдүүлэх, сурталчлах, осол гэмтлээс урьдчилан сэргийлэх ойлголт хандлага сайжруулах зэрэгт анхаарч ажиллах шаардлага байгаа талаар илтгэлдээ дурьдлаа. Мөн Гэр бүлийн гишүүдийн харилцан хүндлэл, хамтын хариуцлага ойлголт хандлага нэмэгдүүлэх, эрүүл дадал хэв маяг, Үлгэр жишээ аав, эрэгтэйчүүдийн сайн жишээг сурталчлах, соён гэгээрүүлэхэд хамтарч ажиллахыг нийт эрчүүддээ уриаллаа.

        Монгол улсын хэмжээнд эрэгтэйчүүдийн 14 эмнэлэг, уралогийн 60 их эмч ажилладаг. Үүний нэг болох “Ашид” эрэгтэйчүүдийн эмнэлэг Орхон аймагт үйл ажиллагаа явуулдаг. Мөн Орхон аймаг БОЭТ-дөө эрэгтэйчүүдийн уралог кабинетийг тохижуулан дуран хагалгаа хийх иж бүрэн тоног төхөөрөмжөөр хангасан нь улсын хэмжээнд жишиг болж байгаа ажээ. 

       Эрэгтэйчүүд нийгмийн хөгжилд арга хэмжээнд урилгаар МУУГЗ Н.Наранбаатар оролцож  “Монгол эрчүүд” лекц уншиж, МУГЖ С.Болд-Эрдэнэ, МУГЖ А.Амгаланбаатар нарын хамтаар мэндчилгээ дэвшүүлж, Монгол эр хүн сэдвээр яриа өрнүүллээ. 

     Үүний дараа үлгэр жишээ болсон 4 аавд аймаг орон нутгийн удирдлагууд хүндэтгэл үзүүлж гарын бэлэг гардуулсанаар арга хэмжээ өндөрлөлөө.