"Мэдээллийн технологи, бизнес, инновацийн өдрүүд - Эрдэнэт 2022" эвент,хакатоны арга хэмжээ хоёр өдөр үргэлжилнэ

Эрдэнэт хотод цахим шилжилт, мэдээллийн технологийн хөгжлийг хурдасгах, гарааны бизнесийг хөгжүүлэх, инноваци, технологи, судалгаа, шинжилгээний ажлын үр дүнг сурталчлах зорилгоор “ IT, BUSINESS, INNOVATION DAYS- ERDENET 2022” эвент арга хэмжээ анх удаа зохион байгуулагдаж байна. 

       Хоёр өдрийн турш зохион байгуулагдах арга хэмжээ өнөөдөр ЭШУТП-ийн Бизнес инкубатор төвийн барилгын нээлтийн үйл ажиллагаагаар эхэллээ. Энэхүү барилга нь орон нутгийн төсвийн 1 тэрбум төгрөгийн хөрөнгө оруулалтаар баригджээ. Нийт 1,700 м2 талбайтай тус төв нь бизнес инкубатор буюу хөгжүүлэлт, инноваци, технологи, шинжлэх ухааны судалгаа, лабораторийн чиглэлээр үйл ажиллагаа явуулах юм.  

 

      Үүний дараа Уурхайчин соёлын ордонд "Мэдээллийн технологи, бизнес, инновацийн өдрүүд - Эрдэнэт 2022" эвент арга хэмжээний нээлтийн үйл ажиллагаа боллоо. 

     Үйл ажиллагааг нээж аймгийн Засаг дарга С.Батжаргал үг хэллээ. Тэрбээр хэлсэн үгэндээ “Улсын хэмжээнд эдийн засгийн хүндрэлээс гарах шинэ сэргэлтийн бодлогод тусгагдсан цахим шилжилт, инноваци, технологи, бизнесийн салбарын хөгжил, төр хувийн хэвшлийн түншлэл, хөрөнгө оруулалтын томоохон бодлого, зорилтууд хэрэгжүүлэх энэ чухал цаг үед мэдээллийн технологи, инноваци, судалгааны салбарын шилдэг бүтээл, технологиуд нэг дээвэр дор цуглаж, тэдгээртэй танилцсан иргэд, бизнес эрхлэгчид чуулга уулзалтаа хийж байгаа нь энэхүү арга хэмжээний онцлог” гэдгийг тодотгов. 

      Мөн энэ үеэр Орхон аймаг ШУА-тай хамтран ажиллах санамж бичиг байгууллаа. Энэхүү санамж бичгийн зорилго нь: Шинжлэх ухааны үндэслэлтэй, эрдэм шинжилгээ, судалгаа, шинэ техник технологи инноваци нэвтрүүлж түншлэлиг өргөжүүлэн дэд бүтцийг сайжруулах замаар орон нутгийг хөгжүүлэх 

- Сургалт судалгаа, нийгэмд чиглэсэн үйл ажиллагааг хэрэгжүүлэх, 

- Орон нутгийг хөгжүүлэх кластерын санаачилга боловсруулах

- Залуучуудын бизнес эрхлэлт, ЖДҮ, гарааны бизнесийг шинжлэх ухаан технологи инновацийн дэвшилд тулгуурлан хөгжүүлэх, 

- Шинжлэх ухаан технологийг орон нутгийн тогтвортой хөгжлийн үндсэн хүчин зүйлсийн нэг болгон хөгжүүлэхэд оршиж байгаа ажээ. 

       Нээлтийн арга хэмжээнд Монгол улсын их хурлын гишүүн Батлут, Орхон аймгийн иргэдийн төлөөлөгчдийн хурлын дарга Мөнхбат, аймгийн Засаг дарга С.Батжаргал, ШУА-ийн ерөнхийлөгч, академич Д.Рэгдэл, Боловсрол Шинжлэх ухааны яамны Шинжлэх ухаан, технологи, инновацийн бодлого, хэрэгжилтийг зохицуулах газрын дарга, доктор Д.Баттогтох, Шинжлэх ухаан, технологийн сан, ШУТИС, АШУҮИС, ХААИС, Эрдэнэт үйлдвэр" ТӨҮГ, Мэдээллийн технологийн үндэсний паркийн удирдлагууд болон бусад зочид төлөөлөгчид, иргэдийн төлөөлөл оролцлоо.  Арга хэмжээ илтгэл, хэлэлцүүлэгүүдээр үргэлжилнэ. 

Мэдээллийн төв