IT, БИЗНЕСИЙН САЛБАРЫНХАН ЭРДЭНЭТ ХОТОД ЧУУЛНА

 Мэдээллийн технологи, боловсролын салбар болон бизнес эрхлэгчид, гарааны бизнес сонирхогчид, цахим шилжилт, инновацийг эрэлхийлэгчдийг нэгтгэсэн хамгийн анхны, хамгийн том уулзалт арга хэмжээ “IT, BUSINESS AND INNOVATION DAYS - ERDENET 2022” эвент болох гэж байна.

     2022 оны 3-р сарын 12-13-нд болох уг эвентийн үеэр “Орхон аймаг, Эрдэнэт хотын хөгжилд цахим шилжилт, мэдээллийн технологийн салбарын нөлөө” сэдвээр хэлэлцүүлэг, “Орхон аймаг, Эрдэнэт хотын хөгжилд инноваци, технологи, аж үйлдвэрийн дөрөвдүгээр хувьсгалын нөлөө” эрдэм шинжилгээний бага хурал, “Стартап нетворкинг”, “Бизнес саммит”, “Стартап менторшип” зэрэг эвентүүд болно. 

    Мөн Инновацийн бүтээгдэхүүн, технологи, Мэдээллийн технологи – боловсролын үзэсгэлэн гарч ICT group, МУИС, ШУТИС, ХААИС зэрэг байгууллагууд өөрсдийн бүтээлүүдээр оролцох юм. Түүнээс гадна аливаа асуудлыг технологийн аргаар шийдэх мэргэжилтнүүд цуглах Хакатон үйл ажиллагаа болж шалгарсан 3 төсөл тус бүрт зохион байгуулагч Эрдэнэт Шинжлэх Ухаан, Технологийн паркаас 10 сая төгрөгийн хөрөнгө оруулалт хийх аж. 

      “IT, BUSINESS AND INNOVATION DAYS - ERDENET 2022” эвентийн хүрээнд болох эрдэм шинжилгээний хурал, хэлэлцүүлэг, уулзалтууд нь сонирхсон бүх иргэн, аж ахуйн нэгжүүдэд нээлттэй бөгөөд 3-р сарын 12-13-нд Соёл урлагийн цогцолборт болно.