“ЭМЭГТЭЙЧҮҮДИЙН ХӨГЖИЛ, ОРОЛЦОО” АРГА ХЭМЖЭЭ БОЛЖ БАЙНА

 Аймгийн Засаг даргын Тамгын газраас “Жендерт суурилсан хүний эрхийг хүндэтгэх аян”-ыг гуравдугаар сараас эхлэн нийт 4 сарын хугацаанд зохион байгуулахаар төлөвлөсөн. Тус аян энэ гуравдугаар сард “Эмэгтэйчүүдийн эрх хамгаалал” сэдвийн дор төлөвлөгөөт ажлуудаар үргэлжилнэ. 

 

      Өнөөдөр “Эмэгтэйчүүдийн хөгжил оролцоо” нэгдсэн арга хэмжээ зохион байгуулагдаж байна. Арга хэмжээний хүрээнд “Эмэгтэйчүүдийн эрх хөгжил өнөөгийн байдал” чөлөөт уулзалт ярилцлага болсон юм. Үүнд төрийн байгууллагын 200 гаруй эмэгтэйчүүд оролцож, хуульч өмгөөлөгч Р.Булгамаа, хүний нөөцийн аудитор н.Батгэрэл нар илтгэл танилцууллаа. 

 

      Мөн аймгийн Засаг даргын санаачилгаар Эмэгтэйчүүдийн эрх оролцоо нэгдсэн арга хэмжээний хүрээнд Орхон аймаг Эрдэнэт хотын иргэн 30 гаран эмэгтэйд дэмжлэг үзүүлсэн юм. 

      Тодруулбал:  10 эмэгтэйд өргөө цагаан гэр, Эмнэлэгт сувилуулах эрхийн батламжийг  10 эмэгтэйд, Жижиг дунд үйлдвэрлэл, үйлчилгээ эрхлэгчдийг дэмжих төсөлд хармагдах 5 эмэгтэйд тус бүр 10 сая төгрөгийн тоног төхөөрөмж авах эрхийн бичиг, Аймгийн ХХҮГ-т ирсэн хүсэлтийг үндэслэн ажилд зуучлалд 5 эмэгтэйг тус тус хамрууллаа. 

       Нэгдсэн арга хэмжээнд аймгийн ИТХ-ын дарга Д.Мөнхбат, Засаг дарга С.Батжаргал, аймгийн Засаг даргын орлогч А.Түвшинжаргал, М.Түмэнжаргал болон албаны хүмүүс оролцлоо. 

Арга хэмжээ 15:00 цагаас “Эмэгтэйчүүдийн хөгжлийн хөтөлбөр”-ийн нээлтийн үйл ажиллагаагаар үргэлжилнэ. 

 

Мэдээллийн төв