“ТЭРБУМ МОД” ҮНДЭСНИЙ ХӨДӨЛГӨӨНИЙГ ХЭРЭГЖҮҮЛЭХ СТРАТЕГИ, ҮЙЛ АЖИЛЛАГААНЫ ТӨЛӨВЛӨГӨӨГ ТАНИЛЦУУЛЛАА

 Өнөөдөр Уурхайчин соёлын ордонд зохион байгуулагдсан Ногоон Эрдэнэт зөвлөгөөнөөр БОАЖЯ-ны ойн бодлого зохицуулалтын газрын дарга Б.Оюунсанаа “Тэрбум мод” үндэсний хөдөлгөөнийг хэрэгжүүлэх стратеги, үйл ажиллагааны төлөвлөгөөг танилцууллаа. 

      Тус төлөвлөгөө нь нийт 3 зорилтын хүрээнд 14 дэд зорилт 142 арга хэмжээ төлөвлөлж 2022-2030 он хүртэл хэрэгжих ажээ. 

     Нэг дүгээр зорилтын хүрээнд: Уур амьсгалын өөрчлөлтийг сааруулах, ойн хомсдол, доройтлыг бууруулах, усны нөөцийг нэмэгдүүлэх зорилгоор түймэрт өртсөн, хөнөөлт шавжид нэрвэгдсэн, мод бэлтгэсэн талбайг ойжуулах, заган ойн экосистемийг хамгаалах, нөхөн сэргээх замаар ойгоор бүрхэгдсэн талбайг нэмэгдүүлэх, ойн аж ахуйн чадавхийг бэхжүүлнэ. 

    Хоёр дугаар зорилтын хүрээнд: Цөлжилттэй тэмцэх, хөрсний элэгдэл, эвдрэлээс хамгаалах, ногоон эдийн засаг, дэд бүтцийн чадавхыг дээшлүүлэх, хүнсний хангамжийг сайжруулах хүрээнд авто зам, төмөр зам, хүнд үйлдвэрийн газар, тариалангийн талбай, төв суурин газруудад  хамгаалалтын ойн зурвас байгуулж агро ойжуулалтыг хөгжүүлнэ. 

    Гурав дугаар зорилтын хүрээнд: Хот, суурины ногоон байгууламжийг нэмэгдүүлэх зорилт тавин ажиллаж байна. 

    Түүнчлэн аймаг, нийслэлийн хэмжээнд төлөвлөсөн нийт мод 837,7 сая ширхэг, томоохон ААН-ийн тарихаар төлөвлөсөн мод 608,5 ширхэг буюу улсын хэмжээнд 1,4 тэрбум ширхэг модыг 2030 он хүртэл тарьж, ургуулахаар урьдчилан төлөвлөжээ.