АЧААЛАЛ ИХТЭЙ УУЛЗВАРУУДЫГ ҮЕ ШАТТАЙГААР ШИНЭЧИЛНЭ

 Аймгийн Засаг дарга С.Батжаргал өнөөдөр Засаг даргын орлогч М.Түмэнжаргал болон холбогдох албаныханы хамтаар Мэдээлэл шуурхай удирдлагын төвд ажиллалаа. Аймгийн хэмжээнд ажиллаж буй камеруудыг нэгдсэн хяналтын системээс удирдахаас гадна Цагдаагийн газартай хамтран нийтийн тээврийн үйлчилгээ, авто замын хөдөлгөөний аюулгүй байдалд тус төвөөс хяналт тавьж ажиллаж байна. 

        Засаг дарга С.Батжаргал: “Цаашид замын хөдөлгөөний аюулгүй байдлыг хангах, түгжрэлийг сааруулах зорилгоор ачаалал ихтэй уулзваруудыг өргөтгөх зэрэг хөрөнгө оруулалтын ажлууд хийгдэнэ. Ингэхдээ авто замын хурд сааруулагч, гэрлэн дохио, явган хүний гарц, гэрэлтүүлэгийг стандартад нийцүүлсэн, шинэ шинэлэг технологи ашиглаж шийдсэн байдлаар хийхээр судалгаа хийгдэж байна.

          Түүнчлэн сургуулийн бүсийн ойр орчимд явган зорчигч, авто зогсоол, дугуйн зогсоол, анхааруулах тэмдэг, хурд сааруулагч зэргийг  төлөвлөж сургууль орчмын бүсийг стандартад нийцүүлэх шаардлагатай” гэв. 

         Өнөөдрийн байдлаар 280 гаруй камераар хотын төв болон гэр хорооллын багуудад хяналтыг хийж байна. Мэдээлэл шуурхай удирдлагын төв болон тус төвд харьяалагдаж байгаа камержуулалт нь нийт 3 тэрбум төгрөгийн өртөгтэй. Өнгөрсөн онд хотын төвийн болон гэр хорооллын багуудын камержуулалтыг нэмэгдүүлэх зорилгоор 1,6 тэрбум төгрөг төсөвлөгджээ.