АЙМГИЙН ЗАСАГ ДАРГЫН 2022 ОНЫ АНХНЫ ШУУРХАЙ ЗӨВЛӨГӨӨН ХУРАЛДЛАА

Аймгийн Засаг даргын 2022 оны анхны шуурхай зөвлөгөөн хуралдлаа. Хуралдааныг аймгийн Засаг дарга С.Батжаргал удирдан явууллаа. 

      Хуралдааны эхэнд өнгөрсөн долоо хоногт өгөгдсөн үүрэг даалгаврын хэрэгжилт болон 70353511 дугаарын  утсанд ирсэн өргөдөл гомдлын шийдвэрлэлтийг танилцууллаа. 

     Аймгийн Засаг даргын шуурхай зөвлөгөөн 2021 онд нийт 50 удаа хуралдаж 454 үүрэг даалгавар өгөгджээ. 2021 оны жилийн эцсийн байдлаар үүрэг даалгаврын хэрэгжилт 98.5 хувийн гүйцэтгэлтэй гарсан байна. 

Коронавируст халдвар (Ковид-19)-ын эсрэг нэмэлт III тунд 28843 иргэн хамрагдаж зорилтот бүлгийн 49,7% хамрагдаад байна. Эрүүл мэндийн байгууллага 84,5%, боловсролын байгууллага 71,6%, бусад төрийн байгууллагууд 81,7%, үйлдвэр, аж ахуйн нэгжүүд 70,2%, худалдааны төвүүд 68,4%, баар, ресторан (хариуцлагын гэрээтэй байгууллагууд) 35,7%, үсчин, гоо сайхны үйлчилгээ үзүүлдэг байгууллагуудын 27,2% тус тус хамрагдсан байна. 

    Засаг даргын орлогч А.Түвшинжаргал мэргэжлийн байгууллагуудын хамтарсан ажлын хэсгийг байгуулж, аймгийн хэмжээнд үйл ажиллагаа явуулдаг 60 гаруй эмийн сангуудын үйл ажиллагаанд хяналт шалгалт хийнэ. Учир нь нэр бүхий 3-4 эмийн сан зөвхөн эмчийн жороор олгох ёстой эмийг дур мэдэн жоргүй олгосон гэх зөрчил илэрсэн гэдгийг хэллээ.   

     Шуурхайн төгсгөлд Засаг дарга С.Батжаргал: 2022 онд орон сууцны хорооллын барилгын ажлууд үргэлжилнэ. Хотын өнгө үзэмжтэй холбоотой газарт орон сууц барихаар газар авчихаад барилгын ажлаа эхлүүлэхгүй байгаа 7-р хороолол зэрэг газруудад дахин мэдэгдэл өгөхийг үүрэг болголоо. 

     Мөн 2022 онд цэвэр технологиор дулаан эрчим хүч үйлдвэрлэж, Эрдэнэт хотод тохирсон хогны менежментийг боловсруулж хог хаягдлын үйлдвэр байгуулах ажлуудыг эрчимжүүлнэ. Энэ долоо хоногоос эхлэн 2022 оны худалдан авах ажиллагаа зарлагдаж эхэлнэ. Иргэд www.tender.gov.mn хаягаар худалдан авах ажиллагааны талаар бүрэн мэдээлэл авах боломжтой гэдгийг хэллээ.