ЯРГУЙТ БАГТ 150 ХҮҮХДИЙН ЦЭЦЭРЛЭГ АШИГЛАЛТАД ОРЛОО

Аймгийн хэмжээнд сургуулийн өмнөх боловсролын байгууллагын хүртээмжийг нэмэгдүүлэх ажлын хүрээнд Орхон аймгийн Баян-Өндөр сумын Яргуйт багт шинээр 150 хүүхдийн цэцэрлэг ашиглалтад орж өнөөдөр нээлтээ хийлээ.

       Нээлтийн үйл ажиллагаанд УИХ-ын гишүүн Д.Батлут, Аймгийн Засаг дарга С.Батжаргал, Засаг даргын орлогч А.Түвшинжаргал болон БШУГ-ын дарга О.Ариунгэрэлт нар оролцлоо. 

       Тус цэцэрлэгийн барилгын ажлыг улсын төсвийн 1,8 тэрбум төгрөгийн хөрөнгө оруулалтаар хийж гүйцэтгэсэн байна. Энэхүү цэцэрлэг ашиглалтад орсноор 36 байнгын ажлын байр шинээр бий болж, Яргуйт, Даваат багийн 200 гаруй хүүхэд гэрийнхээ ойр цэцэрлэгт хамрагдаж, алслагдсан багт сургуулийн өмнөх боловсролын үйлчилгээний хүртээмж нэмэгдэж байгаа юм. 

    Орхон аймаг сүүлийн жилүүдэд сургуулийн өмнөх боловсролын үйлчилгээний хүртээмжийг нэмэгдүүлэх чиглэлээр олон арга хэмжээг төлөвлөж, хэрэгжүүсэн. Үүний үр дүнд Баянбулаг, Цагаанчулуут багуудад 150, 280 хүүхдийн хүчин чадалтай 2 цэцэрлэгийг шинээр барьж ашиглалтад оруулж, хүүхдийн ачаалал хэтэрсэн 5 цэцэрлэгийг өргөтгөж, хүчин чадлыг нь нэмэгдүүлээд байна.