“Төрийн болон орон нутгийн өмчийн 2022 оны улсын үзлэг тооллого” сургалт боллоо

Төрийн болон орон нутгийн өмчийн 2022 оны улсын үзлэг тооллогыг зохион байгуулах ажил эхэлж буйтай холбоотойгоор Төрийн өмчийн бодлого зохицуулалтын газар, аймгийн ЗДТГ, Орон нутгийн өмчийн газраас хамтран “Төрийн болон орон нутгийн өмчийн 2022 оны улсын үзлэг тооллого” сургалтыг өнөөдөр зохион байгуулав. Сургалтад Засаг дарга С.Батжаргал, Төрийн өмчийн бодлого зохицуулалтын газрын Төрийн өмчийн бүртгэл ашиглалтын хэлтсийн дарга Д.Нарангэрэл, төрийн болон орон нутгийн өмчит байгууллагуудын удирдлагууд, мэргэжилтэн албан хаагчид оролцлоо.

   Засгийн газрын 2020-2024 оны үйл ажиллагааны хөтөлбөрт төрийн болон орон нутгийн өмчийн бүртгэл ашиглалт сайжруулалт, хамгаалалтыг сайжруулж, төрийн болон орон нутгийн өмчийн улсын үзлэг тооллогын ажлыг зохион байгуулж төрийн өмчид бүртгэлээр хяналт тавих, төрийн өмчит болон төрийн өмчийн оролцоотой хуулийн этгээдийн засаглалыг олон улсын жишигт нийцүүлэх, эдийн засгийн үр ашгийг нэмэгдүүлэх, хөрөнгө оруулалт төлөвлөлтийг сайжруулах, үр өгөөжийг дээшлүүлэх ажлыг зохион байгуулах зорилтыг дэвшүүлсэн.

   Төрийн болон орон нутгийн өмчийн үзлэг тооллогыг 2020 онд явуулахаар Засгийн газрын 2020 оны есдүгээр тогтоол батлагдсан боловч дэлхий нийтэд гарсан цар тахлын улмаас уг тогтоолд 2 удаа өөрчлөлт оруулж 2022 онд явуулахаар шийдвэрлэсэн юм.

   Засаг дарга С.Батжаргал “Монгол Улсын Төрийн болон Орон нутгийн өмчийн тухай хууль 1996 онд батлагдсанаар орон нутаг өөрийн гэсэн өмчтэй болох эрх зүйн орчин бүрдсэн. 1997 онд төрийн өмчийн тооллогыг улс орон даяар анх удаа зохион байгуулж, аймаг, нийслэлийн өмчлөлд эр хөрөнгө шилжүүлэх тухай УИХ-ын 29 дүгээр  тогтоол 1999 оны гуравдугаар сард гарч байв. Ингэснээр манай аймаг 61 байгууллага 11.6 тэрбум төгрөгийн үндсэн хөрөнгө төрийн өмчлөлөөс орон нутгийн өмчлөлд шилжин ирснээр өөрийн мэдлийн өмч хөрөнгөтэй түүнийгээ захиран зарцуулах эрхтэй болсон” гэлээ.

    2021 оны жилийн эцсийн байдлаар Орхон аймаг орон нутгийн төсөвт 99 байгууллага 473.9 тэрбум төгрөгийг хөрөнгөтэй гэж бүртгэгджээ. Төрийн өмчийн бодлого зохицуулалтын газрын тогтоолоор баталсан журам, маягт зааврын дагуу үнэн зөв бөглөж, түргэн шуурхай явуулж дүн мэдээгээ ирэх зургадугаар сарын 10-ны дотор хүлээлгэн өгөх үүрэгтэй.

Төрийн болон орон нутгийн өмчийн тухай хуулийн 70 дугаар зүйлийн 4 дэх хэсэгт заасны дагуу Засгийн газрын бүрэн эрхийн хугацаа эрхэлсэн анхны жилийн IY  улиралд багтаан 4 жилд нэг удаа Төрийн болон орон нутгийн өмчийн эд хөрөнгийн улсын тооллогыг явуулна гэж заасны дагуу зохион байгуулж байна. 2016 онд явагдсан тооллогоор нийт 6086 хуулийн этгээдэд нийт 30 их наяд төгрөгийн хөрөнгө тоологджээ.

Төрийн болон орон нутгийн өмчийн эд хөрөнгийн улсын үзлэг, тооллогын зорилго нь:

-Хөрөнгийн чанар байдал, хамгаалалт, үнэлгээ, бүртгэлд үнэлэлт өгөх,

-Засгийн газрын шийдвэр, аргачлалын дагуу хийсэн дахин үнэлгээний дүнгээр гарсан зөрчил дутагдлыг арилгасан байдлыг хангах,

-Тооллогын дүнгээр төрийн болон орон нутгийн өмчит болон өмчийн оролцоотой хуулийн этгээдийн мэдээллийг улсын бүртгэлийн мэдээлэлтэй тулган баталгаажуулах гэх мэт хэд хэдэн зорилгыг агуулсан байдаг.