"Эмч дэд хөтөлбөр"-ийг хэрэгжүүлснээр 15 нэр төрлийн техник тоног төхөөрөмж, 21 нэр төрлийн тусламж үйлчилгээг нэвтрүүлжээ

 Орхон аймгийн эрүүл мэндийн салбарт ажиллаж буй эмч нарын мэдлэг чадвар, ёс зүйн төлөвшилийг сайжруулах, гадаад харилцааг нээлттэй түвшинд хүргэх, нийгмийн асуудлыг  дэмжих, шинэ технологи арга барилыг орон нутагт нутагшуулах, хүний нөөцийн тогтвортой байдлыг хангах зорилгоор “Эмч” хөтөлбөрийг 2021 онд 5 дахь жилдээ  хэрэгжүүллээ.

   Уг хөтөлбөрийг энэ онд дахин хэрэгжүүлэхээр үйл ажиллагаандаа тусгасан байгаа билээ.Тус хөтөлбөрийн хүрээнд 22 үйл ажиллагааг зохион байгуулж, хэрэгжүүлсэн байна. 

ХӨТӨЛБӨРИЙН ҮР ДҮНГЭЭС ДУРДВАЛ...

Тайлант хугацаанд лавлагаа шатлалд 15 нэр төрлийн өндөр өртөг бүхий техник тоног төхөөрөмж, 21 нэр төрлийн тусламж үйлчилгээг  нэвтрүүлжээ.
Тухайлбал, 1.БОЭТ орон нутгийн 1,1 тэрбум төгрөгийн төсвөөр бүдүүн шулуун гэдэсний дуран, ходоод бүдүүн гэдэсний дурангийн аппарат ариутгагч төхөөрөмж улаан хоолой ходоодны дуран, ургийн гажиг оношлох 4D ЭХО аппарат, дижитал рентген нийлүүлэгдсэн. Улсын төсвийн 2,5 тэрбум төгрөгөөр ангиографийн аппарат, компьютертомографийн аппарат нийлүүлэгдэж тархины харвалт, зүрхний шигдээсийг эрт илрүүлж, оношлох, эмчлэх чадавхыг нэмэгдүүлсэн. Тайлант хугацаанд ангиографын аппаратаар 2 хүнд оношилгоо хийсэн. Мөн шинээр хүүхдийн ясны хагалгааны шинэ төрөл, ходоод тайрах хагалгааг нутагшуулсан. Хүчилтөрөгчийн бэсрэг үйлдвэр нээгдсэн.

  2.Хувийн хэвшлийн Баян-Өндөр мед нэгдсэн эмнэлэг нь, дүрс оношилгоонд дижитал рентген, ходоодны дуран, нүд болон чих хамар хоолойн бүрэн иж бүрдэлтэй кабинет шинээр, Ачит эмнэлэг өндөр  хүчин чадал бүхий өнгөт ЭХО аппаратыг тусламж үйлчилгээнд нэвтрүүлсэн. Медипас төрөлжсөн төв эмнэлэг нь лабораторийн  чиглэлээр- 8, эмчилгээний чиглэлээр -3,  оношилгооны чиглэлээр -1, сувилахуйн чиглэлээр -1, нийт 13 төрлийн тусламж  үйлчилгээг шинээр нэвтрүүлсэн. Эрхэст Оргил эмнэлэг унтуулгын болон төвөнхийн оношилгоо, хамрын мэс заслын дурангийн аппарат авч,  хамрын дайвар, таславч нөхөх, хэнгэрэг нөхөх хагалгааг 20 хүнд хийсэн. Нейрон мэдрэлийн ортой эмнэлэг нь тархины цахилгаан бичлэгийг удаан хугацаанд хийх ЭЭГ-ийн аппаратыг авч, 562 хүүхдэд оношилгоо хийсэн байна. Шинэ эрин мед төрөлжсөн клиникт гэмтлийн тусламж үйлчилгээнд үеийн гиалуроны хүчил тарилгыг нэвтрүүлсэн.

   3.Улсын төсвийн 900 сая төгрөгийн санхүүжилтээр сум, өрхийн эрүүл мэндийн төвүүдэд 4D ЭХО аппарат, биохимийн аппарат, шээсний хагас анализатораар хангагдаж, тоног төхөөрөмжийн хангалт 95 хувьд хүрсэн. Өрхийн эрүүл мэндийн төвүүдэд 25179 шинжилгээ хийгдсэнээс 7,5 хувь  нь  төлбөртэй хийгдсэн нь өмнөх оноос  2.8 хувиар буурчээ.