“Залуучуудын хөгжлийн хөтөлбөр” тав дахь жилдээ амжилттай хэрэгжиж байна

Аймгийн Засаг даргын зөвлөлийн 2022 оны XI удаагийн хуралдаан өчигдөр болсон. Хуралдаанаар "Залуучуудын хөгжлийн хөтөлбөр"-ийн 2021 оны үйл ажиллагааны тайланг хэлэлцсэн. Уг хөтөлбөр тав дахь жилдээ хэрэгжиж буй. Өнгөрсөн онд Залуучуудын оюуны болон бие бялдрын хөгжлийг дэмжих, ур чадварыг хөгжүүлэх, Залуучуудын хөдөлмөр эрхлэлт, сайн дурын ажлыг дэмжих, Залуучуудын хөгжил, оролцоог дэмжих, амралт чөлөөт цагийг зөв зохистой өнгөрүүлэх боломж, нөхцлийг нэмэгдүүлэх  гэсэн гурван зорилтын хүрээнд хэд хэдэн үйл ажиллагаа зохион байгуулсан. 

    Тухайлбал, 2021 онд Залуучуудын оюуны болон бие бялдрын хөгжлийг дэмжих, ур чадварыг хөгжүүлэх зорилтын хүрээнд өсвөр насны охид болон эмэгтэйчүүдэд зориулсан эрүүл мэндийн боловсрол олгох онлайн 36 удаагийн сургалтыг явуулж, 2544 өсвөр үе, хүүхдийг оролцуулжээ. Мөн ’БИ ХОРТ ЗУРШИЛГҮЙ ЗАЛУУ’’ аяны хүрээнд архи, тамхи, мансууруулах бодисоос урьдчилан сэргийлэх бүх төрлийн нөлөөллийн үйл ажиллагааг зохион байгуулж, залуустаа хүрч ажиллахыг зорьсон байна. Аймгийн мэргэжлийн залуу сэтгэл зүйчид хамран “Сэтгэлийн дархлаа-2” аяныг нэг сарын хугацаатайгаар зохион байгуулж, аяны хүрээнд сэтгэлзүйн хямралаас урьдчилан сэргийлэх зөвлөмж,  сэтгэл заслын ганцаарчилсан зөвлөгөөг 30 хүнд хүргэж ажиллажээ. 

    Залуучуудын хөдөлмөр эрхлэлт, сайн дурын ажлыг дэмжих зорилтын хүрээнд Залуучуудыг  ажлын байранд холбон зуучлах, мэргэжил сонголт, мэргэжлийн баримжаа олгох 12 удаагийн сургалт, нөлөөллийн ажлыг зохион байгуулж, 651 залуучуудыг хамруулжээ. Үүний зэрэгцээ 21 залууг байнгийн болон цагийн ажлын байранд холбон зуучилсан байна.  Хөгжлийн ялгаатай чадвартай хүмүүсийн хөдөлмөр эрхлэлтийг дэмжих зорилгоор ‘’ХӨДӨЛМӨР ЭРХЛЭХЭД ХААЛГАА НЭЭЦГЭЭЕ’’ үзэсгэлэн худалдааг 3 дахь жилдээ Хөгжлийн бэрхшээлтэй хүүхэдтэй эцэг эхийн холбоотой хамтран зохион байгуулж,  15 хүүхэд залуучуудын 60 бүтээлийг олонд дэлгэсэн байна. Эдгээрээс 25 бүтээл  зарагдаж, 1.800.000 төгрөгийн орлогыг үзэсгэлэнд оролцсон иргэдэд олгосон гэх мэт бодит ажлыг зохион байгуулжээ. 

     Залуучуудын хөгжил,  оролцоог дэмжих, амралт чөлөөт цагийг зөв зохистой өнгөрүүлэх боломж, нөхцлийг нэмэгдүүлэх   зорилтын хүрээнд Залуус, хүүхдүүдийнхээ сурах боломжийг өргөтгөх, мэдлэг чадварыг нь дээшлүүлэх зорилгоор амьжиргааны баталгаажих түвшингөөс доогуур орлоготой ч дээд боловсрол амжилттай эзэмшиж байгаа 12 оюутанг аймгийн Засаг даргын нэрэмжит тэтгэлэгт хамруулсан бол хорих ангид хүмүүжиж байгаа залуучуудыг нийгэмшүүлэх сургалтыг үе шаттай зохион байгуулж, номын хандивын аяны хүрээнд хорих ангийн номын санг өргөжүүлжээ.  Хорих ангид ял эдэлж буй 10 залууд сэтгэлзүйн зөвлөгөө өгч, суллагдсан 2 залууг ажлын байранд холбон зуучилсан гээд хийж хэрэгжүүлсэн үр дүн гарсан олон ажлыг зохион байгуулжээ. 

    Үүний үр дүнд залуучуудад хувь хүний, эрүүл мэндийн, гэр бүлийн боловсрол, мэргэжил сонголт, гарааны бизнесийн чиглэлээр цахим болон танхимаар 70 төрлийн сургалт нөлөөллийн үйл ажиллагаа зохион байгуулж 15000 гаруй өсвөр үе, залуучуудыг үйл ажиллагаандаа хамруулсан, сайн дурын үйл ажиллагаанд нийт залуучуудын 25,4 хувийг  хамруулсан нь өнгөрсөн оныхтой харьцуулахад 5 хувиар өссөн нь залуучууд нийгэмд тустай сайн дурын ажилд оролцох идэвхи нь нэмэгдсэн гэх мэтээр эерэг нөлөө үзүүлсэн үр дүнг олныг дурдаж болно.