Хөгжлийн бэрхшээлтэй иргэдийн хөгжил оролцоо нэгдсэн арга хэмжээ болж байна

Орхон аймгийн Засаг даргын Тамгын газраас зохион байгуулж буй “Хөгжлийн бэрхшээлтэй иргэдийн хөгжил оролцоо” нэгдсэн арга хэмжээ өнөөдөр уурхайчин соёлын ордонд болж байна. 

      Энэхүү нэгдсэн арга хэмжээ нь хөгжлийн бэрхшээлтэй иргэдийн хөгжил оролцоог нэмэгдүүлэх 4-р сарын аяны хүрээнд зохион байгуулагдаж буй хаалтын арга хэмжээ юм. 

      Үйл ажиллагаанд аймгийн ИТХ-ын дарга Д.Мөнхбат, Засаг дарга С.Батжаргал, аймгийн Засаг даргын орлогч А.Түвшинжаргал, ХНХ-ын Хүн амын хөгжлийн бодлогын хэрэгжилтийг зохицуулах газрын дарга С.Тунгалагтамир, ХНХЯ-ны хүн амын хөгжлийн бодлогын хэрэгжилтийг зохицуулах газрын мэргэжилтэн Б.Болороо болон манай аймагт үйл ажиллагаа явуулдаг хөгжлийн бэрхшээлтэй иргэдийн дэмжин туслах чиглэлээр идэвхитэй үйл ажиллагаа явуулдаг ТББ-ын төлөөллүүд, холбогдох мэргэжилтнүүд оролцож байна. 

      Арга хэмжээг нээж аймгийн Засаг дарга С.Батжаргал хэлсэн үгэндээ: Хөгжлийн бэрхшээлтэй иргэдийн эрхийг хангах, сурч боловсрох, хөдөлмөрлөх, бие даан амьдрахад иргэдийн өөрсдийн хичээл зүтгэлээс гадна төрийн болон төрийн бус байгууллага, аж ахуйн нэгж, хамт олны дэмжлэг туслалцаа нэн чухал гэдгийг онцолж, Хөгжлийн бэрхшээлтэй иргэдэд гол тулгамдсан асуудал болох дэд бүтцийн асуудалд байгууллага, аж ахуйн нэгжүүд санал санаачлага гарган ажиллаасай гэж уриаллаа. 

      Мөн Орхон аймагт 4216 хөгжлийн бэрхшээлтэй иргэн байгаа нь хүн амын 4,0 орчим хувийг эзэлж байна. Эдгээрийн 29.7% нь төрөлхийн, 70.2% нь олдмол байгаа нь анхаарах асуудал гэдгийг дурьдсан юм

      Үйл ажиллагааны үеэр хөгжлийн бэрхшээлтэй иргэний чиглэлээр үйл ажиллагаа явуулж буй 8 ТББ болон 20 гаруй иргэдийн үйлдвэрлэсэн бараа бүтээгдэхүүнээр үзэсгэлэн худладаа гарч байгаа.  

   Хөгжлийн бэрхшээлтэй иргэдийн хөгжил оролцоо нэгдсэн арга хэмжээний хүрээнд сургууль, цэцэрлэгийн дэмжлэгийн багийг чадавхижуулах сургалт, хүүхдийн эрт илрүүлэг, үзлэг, зөвлөгөө мэдээлэл өгөх, эмч, багш нарыг чадавхижуулах сургалтыг зохион байгуулж, дэд бүтэц, орчны хүртээмжийг үнэлэх, зөвлөмж өгөх, “Тэгш боломж-ээлтэй орчин” аян зарлаж, хөгжлийн бэрхшээлтэй хүүхэдтэй ажилладаг Төр, ТББ-уудыг чадавхижуулах, туршлага судлуулах, Хөгжлийн ялгаатай залуучууд, их дээд сургууль, МСҮТ-үүдийн залуучуудын хамтарсан Сагсан бөмбөг, Гар бөмбөгийн тэмцээн  зэрэг ажлуудыг зохион байгуулж өнөөдрийн энэхүү нөлөөллийн ажлаар сарын аяны хаалтыг хийж байгаа юм.