“Бүсийн төвийн удирдах бүрэлдэхүүний гамшиг, онцгой байдлын үеийн хариу арга хэмжээ” сургалт болж байна

ОБЕГ, ДЗОУБ, АНУ-ын Хөгжлийн агентлагаас хамтран зохион байгуулж буй “Бүсийн төвийн удирдах бүрэлдэхүүний гамшиг, онцгой байдлын үеийн хариу арга хэмжээ” сургалт өнөөдөр Орхон аймагт эхэллээ.

   Сургалтад аймгийн Онцгой комиссын гишүүд болон удирдах албан тушаалтнууд оролцож байна.  ОБЕГ-ын Дэд дарга, Бригадын генерал Б.Ууганбаяр “Шадар сайдын баталсан ОБЕГ-ын 2022 оны үйл ажиллагааны төлөвлөгөөнд ирэх намар аравдугаар сард Орхон аймагт “Гамшгаас хамгаалах иж бүрэн сургуулилтыг зохион байгуулахаар тусгасан, улсын чанартай томоохон арга хэмжээ болно. Үүний урьтал болгож энэ удаагийн сургалтыг зохион байгуулж байгаа гэдгийг Та бүхэн ойлгох хэрэгтэй. Эхний ээлжинд удирдах албан тушаалтнууд бэлтгэлээ хангасан, тодорхой төвшинд ойлголттой болсон байх нь энэ сургалтын гол зорилго юм” хэмээн сургалтын үйл ажиллагааг нээв.

  ДЗОУБ, АНУ-ын Хөгжлийн агентлагаас “Гамшигт тэсвэртэй орон нутаг” төслийг 2018 оноос эхэлж хэрэгжүүлжээ. Төслийн хоёр дахь үе шат 2020 оноос эхэлсэн байна. Төслийн зорилго иргэдийн амьжиргааг хамгаалах, мал аж ахуйн салбарт гамшгийн эрсдэлийг бууруулах, хот суурин газрын гамшгийн эрсдэлийг бууруулах, даван туулах, чадавхийг бэхжүүлэх замаар орон нутагт тохиолдож болзошгүй гамшгийн эрсдэлийг үе шаттайгаар бууруулах юм.

  Дорнод, Улаанбаатар, Орхон аймагт хотуудын гамшгийг эрсдэлийг бууруулах, Увс, Говь-Алтай, Дорноговь, Дундговь зэрэг аймагт хөдөө аж ахуйн гамшгийн эрсдэлийг бууруулах чиглэлээр дээрх төсөл  хэрэгжиж байна. Төслийн хүрээнд энэ онд хийх үйл ажиллагаануудаас дурдахад, гамшгийн эрсдэлийг бууруулах, мэдлэг чадварыг олон нийтэд олгох “Бэлэн бай” сургалтын мэдээллийг илүү хүртээмжтэй болгох үүднээс гар утасны АПП-д суурилсан сургалтын модуль бэлтгэн боловсруулах, олон нийтийн оролцоотой гамшгийн эрсдэлийн үнэлгээ хийх зэрэг хэд хэдэн ажлыг зохион байгуулахаар төлөвлөжээ.

  Сүүлийн гурван жилийн хугацаанд  Орхон аймагт гамшигт ослын 200 гаруй дуудлага бүртгэгджээ. Жишээлбэл, 2020 онд 100 дуудлага бүртгэгдэж 110 гаруй сая төгрөгийн хохирол учруулсан бол 2021 онд 94 гамшигт ослын дуудлага бүртгэгдэж 76 сая төгрөгийн хохирол, 2022 оны эхний дөрвөн сарын байдлаар 45 гамшигт осол бүртгэгдэж 163 сая төгрөгийн хохирол учирчээ. Нийт гамшиг ослын дуудлагын ихэнх хувийг гал түймрийн шалтгаант болон үер усны дуудлага эзэлж байна.

   Үдээс өмнөх сургалтаар Гамшгаас хамгаалах менежментийн онол, хандлага сэдвээр ГУСГ-ын ахлах мэргэжилтэн, дэд хурандаа Д.Хадбаатар, Гамшгийн эрсдлийг бууруулах бодлогын хэрэгжилт сэдвээр ГЭУГ-ын Гамшгийн эрсдэлийн үнэлгээний хэлтсийн дарга, дэд хурандаа  Б.Базаррагчаа нар мэдээлэл өглөө.

Сургалт үргэлжилж байна.