Аймгийн Засаг даргын зөвлөлийн 2022 оны XI удаагийн хуралдаан боллоо

Аймгийн Засаг даргын зөвлөлийн 2022 оны  XI удаагийн хуралдаан боллоо. Хуралдаанаар аймгийн 2022 оны төсвийн тодотгол, аймгийн Засаг даргад залуучуудын төлөөллөөс ирүүлсэн албан шаардлагын талаар, “Эмч, Залуучуудын хөгжлийн хөтөлбөр”-ийн 2021 оны хэрэгжилт, Түгээмэл тархацтай ашигт малтмалын хайгуулын тусгай зөвшөөрөл  зэрэг таван асуудлыг хэлэлцлээ.

     Аймгийн 2021 оны төсвийн шилжих үлдэгдэл төсвийн гүйцэтгэлээр 18,7 тэрбум төгрөг гарсан. Үүний 9.2 тэрбум төгрөгийг аймгийн 2022 оны төсвийг батлуулахад төлөвлөж батлуулсан. Үлдэгдэл 9.5 тэрбум төгрөгийг зарцуулалтад төсвийн тодотгол хийснийг хэлэлцэв. 

       Засгийн газар хэмнэлтийн бодлого барьж буйтай холбоотойгоор аймгийн Засаг дарга С.Батжаргал зарим үйл ажиллагааны хөрөнгө оруулалтыг эргэж харах, хасах чиглэл өглөө. 

      Орхон аймаг 2017 оноос хойш тав дахь жилдээ “Эмч хөтөлбөр”-ийг хэрэгжүүлж буй. Хөтөлбөрийн зорилго нь аймгийн эрүүл мэндийн салбарт ажиллаж буй эмч нарын мэдлэг ур чадвар, ёс зүйн төлөвшлийг сайжруулах, гадаад харилцааг нээлттэй төвшинд хүргэх, шинэ технологи арга барилыг орон нутагт нутагшуулах, нийгмийн асуудлыг дэмжих, хүний нөөцийн тогтвортой байдлыг хангах юм. 

Энэ хугацаанд эмч, эмнэлгийн мэргэжилтнүүдийн мэдлэг ур, чадварыг дээшлүүлэх чиглэлээр гадаадын 13 оронд 188 мэргэжилтнийг сургаж, туршлага судлуулсан байна. Түүнчлэн дотоодын 199 сургалтад давхардсан тоогоор 9566 эмч, эмнэлгийн мэргэжилтнийг хамруулсны үр дүнд 15 төрлийн шинэ технологи арга барилыг орон нутагт нутагшуулсны үр дүнд иргэд чанартай тусламж үйлчилгээг орон нутагтаа авах нөхцөл бүрдэж, лавлагаа шатлалын эмнэлгийн төвлөрлийг бууруулж, хүлээгдэл чирэгдэл багассан гэх мэт олон эерэг  үр дүнг үзүүлжээ.