Хөдөө аж ахуйн салбарын ажилтны зөвлөгөөн боллоо

 Аймгийн хөдөө аж ахуйн салбарт ажиллаж байгаа ажилтан, ажиллагсад болон малчин тариаланчдад тулгамдаж буй асуудал, цаашид хийгдэх ажил, холбогдох мэдээллүүдийг өгөх зорилгоор хөдөө аж ахуйн салбарын ажилтны зөвлөгөөнийг Жаргалант суманд зохион байгууллаа. 

   Зөвлөгөөнд аймгийн Засаг дарга С.Батжаргал, аймгийн Засаг даргын орлогч А.Түвшинжаргал болон холбогдох хэлтэс газрын удирдлагууд оролцож салбар салбарын мэдээллийг танилцууллаа. 

    Аймгийн Засаг дарга С.Батжаргал зөвлөгөөнийг нээж хэлсэн үгэндээ: “Хөдөө аж ахуй нь Монгол Улсын уламжлалт салбар бөгөөд хүн амын хүнсний хангамж, үндэсний үйлдвэрийн түүхий эдийн гол тулгуур болж байгаагийн хувьд улс орны нийгэм, эдийн засгийн хөгжлийн төвшинг тодорхойлох нэг үндэс юм. Манай аймаг мал аж ахуй, газар тариаланг хослуулан хөгжүүлж, малын чанар, мал эмнэлэг, үржлийн ажил үйлчилгээг сайжруулж, газар тариалангийн үйлдвэрлэлийг эрчимжүүлснээр хүн амын эрүүл, аюулгүй, экологийн цэвэр хүнсний хэрэгцээг хангах, боловсруулах үйлдвэрт чанартай түүхий эдийг нийлүүлэх нь бидний ажлын гол үр дүн” гэдгийг онцоллоо. 

Үүний дараа аймгийн ХХААГ-ын дарга Ж.Бат-Өлзий, МЭГ-ын дарга П.Эрдэнэжаргал нар 2021 онд хийж хэрэгжүүлсэн ажил болон цаашид авч хэрэгжүүлэх ажлын талаар мэдээлэл өгсөн юм. 

Мөн зөвлөгөөнд Жаргалант суманд байгуулагдаж буй Агропаркийг байгуулахад хамтран ажиллаж байгаа “Каритас Монгол” ТББ-га оролцож үйл ажиллагааны чиглэл болоод гурван улирлын хүлэмжийг хэрхэн барих аргачлалын талаар болон аймгийн Татварын хэлтэс, Нийгмийн даатгалын хэлтэс, ХХҮГ, УЦУОШТ, Хаан банк төрийн банкууд тус тус мэдээлэл хийлээ. 

Зөвлөгөөнд нийт 200 гаруй малчин тариаланчид, салбарын мэргэжилтнүүд оролцсон бөгөөд малчин тариаланчид орон нутгийн удирдлагууд болон салбарын мэргэжилтнүүдийн асуулт хариулт явагдсанаар зөвлөгөөн өндөрлөлөө.