Гэнэтийн аюул,болзошгүй эрсдэлээс урьдчилан сэргийлж, бага насны хүүхэддээ тавих хараа хяналтаа сулруулахгүй байхыг эцэг, эхчүүдэд анхаарууллаа

Тээврийн цагдаагийн албанаас Монгол Улсын хэмжээнд “Зөвийг хэвшүүлье” аяны хүрээнд “Сурагчийн аюулгүй байдалд эцэг, эх асран хамгаалагчийн үүрэг оролцоо” арга хэмжээг зохион байгуулж буй.

Нэг сарын турш үргэлжлэх уг аяныг Орхон аймагт зохион байгуулах ажлын төлөвлөгөөг аймгийн Засаг дарга С.Батжаргал, ИТХ-ын дарга, аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн дарга Д.Мөнхбат нар баталжээ.

   Аяны хүрээнд хүүхдийг зам тээврийн осол хэрэг, болзошгүй байгалийн аюулт үзэгдлээс урьдчилан сэргийлэхэд төрийн болон төрийн бус байгууллага, багш, эцэг эхчүүд, асран хамгаалагчийн үүрэг оролцоог нэмэгдүүлэх юм. Түүнчлэн замын хөдөлгөөний аюулгүй байдлыг хангах, зөв дадал, мэдлэгийг хүүхэд багачуудад өгөх, сурган хүмүүжүүлэгч, эцэг,эхчүүдэд хууль эрх зүйн мэдлэгийг олгох ажлыг Орхон аймгийн хэмжээнд зохион байгуулах юм.

Нэг сарын хугацаатай уг аяныг хэрэгжүүлснээр хүүхдийг зам тээврийн осол, болзошгүй байгалийн аюулт үзэгдлээс урьдчилан сэргийлэх, эцэг эх, асран хамгаалагчийн үүрэг хариуцлагыг дээшлүүлэхэд төрийн болон төрийн бус байгууллагуудын хамтын уялдааг сайжруулахад оршиж байгаа юм.

Өнөөдөр аймгийн Боловсрол, соёл урлагийн  газар, Замын цагдаагийн газар, Эрүүл мэндийн төв, Онцгой байдлын газар, БОЭТ зэрэг байгууллагаас аяны талаар мэдээлэл өгөхийн сацуу гэнэтийн аюул ослоос урьдчилан сэргийлж, үр хүүхэддээ тавих анхаарлаа сулруулахгүй байхыг  эцэг, эх, асран хамгаалагч нарт сэрэмжлүүлж хэвлэлийн бага хурал хийлээ.

     Монгол Улсад сүүлийн 10 жилд тохиолдсон аюулт үзэгдэл ослын улмаас 494 хүүхэд амь насаа алдсаны, 49 хувийг усны осол, 40 хувийг объектын гал түймэр эзэлж байна гэх мэдээллийг Онцгой байдлын газраас өгөв. Тодруулбал, 2020 онд 30 хүүхэд усанд осолдож амь насаа алдсан бол 2021 онд 31 хүүхэд энджээ. Ганцхан энэ судалгаанаас эцэг эхийн  үр хүүхэддээ тавих хараа хяналт хэр сул байгааг харж болохоор.

   Бага насны хүүхдийг гэнэтийн осол гэмтлээс урьдчилан сэргийлж, хамгаалж чадвал дэлхий дахинаа өдөрт 2000 хүүхдийн амь насыг  хамгаалж чадна гэж НҮБ-аас судалгаа гарсан байдаг байна. 

   Орхон аймагт 2021 онд 872 осол гэмтлийн өвчлөл бүртгэгдсэний 222 тохиолдол буюу 25.4 хувь нь 0-18 насны хүүхдүүд эзэлжээ.  Үүнээс 72 буюу 32 хувь нь зам тээврийн ослын шалтгаант байгаа бол ахуйн осол 27 буюу 13 хувь, өндрөөс унах, тоглоомын талбайд бэртэл гэмтэл авах, гаднын биет залгих, халтирч унах зэрэг бусад шалтгаанаар 117 буюу 53 хувийг эзэлж байгаа нь мөн л эцэг эхчүүдийн хараа хяналттай холбоотой юм.

   Өнгөрсөн  жил улсын хэмжээнд зам тээврийн ослын улмаас 51 хүүхэд нас барсны Амь насаа алдсан хүүхдүүдийг насны байдлаар нь авч үзвэл 0-7 насны 32 хүүхэд, 7-оос 14 насны 14 хүүхэд, 15-17 насны 5 хүүхэд өртсөн байна.

Харин аймгийн хэмжээнд бага насны хүүхэд зам тээврийн осолд өртсөн 11 хэрэг бүртгэгдэж, есөн хүүхэд хүнд, хөнгөн гэмтэл авсан гэх мэдээллийг Замын цагдаагийн тасгийн дарга, Цагдаагийн хошууч Х.Одбаяр мэдээлэлдээ дурдсан. Хүнд ба хөнгөн гэмтэл авсан есөн хүүхдийн 6 нь жолоочийн буруутай үйлдэл, гурав нь явган зорчигчийн буруутай үйлдлээс болсон  байна.

  Иймд болзошгүй эрсдэлээс урьдчилан сэргийлж, хүүхэд багачуудад Замын хөдөлгөөний мэдлэг олгох, эцэг эх, асран хамгаалагчийн үүрэг оролцоог нэмэгдүүлж багш нийгмийн ажилтнууд Замын хөдөлгөөний аюулгүй байдлын тухай хуулийн 13.2.7 дугаар заалтыг хэрэгжилтэд анхаарахыг холбогдох албаныхан сануулав.

   Уг заалтад “Эцэг эх, асран хамгаалагч, бүх шатны боловсролын байгууллагын холбогдох албан тушаалтан 10 хүртэлх насны хүүхдийг харгалзах хүнгүйгээр замын хөдөлгөөнд оролцуулахгүй байх, хүүхдийг зам тээврийн осол, болзошгүй осолд өртөхөөс урьдчилан сэргийлэх нь гол зүйл юм” гэсэн байдгийг дагаж мөрдөхийг анхааруулав.