1000 гаруй өрхийн 24499 үхэр, 300 гахайг вакцинжуулах ажил өнөөдрөөс эхэллээ

Мал амьтны гоц халдварт  шүлхий  өвчнөөс урьдчилан сэргийлэх вакцинжуулалтын сарын аян  улс орон даяар өнөөдрөөс эхэлж байна.  Улсын Онцгой комиссын хоёрдугаар тогтоол, Мал эмнэлгийн ерөнхий газрын даргын 72 дугаар тушаал гарсны дагуу уг сарын аян өрнөж буй.  Орхон аймагт  аяны нээлт өнөөдөр болж, Мал эмнэлгийн газрууд 1000 гаруй өрхийн 24499 үхэр, 300 гахайд вакцинжуулалт хийхээр товлосон долоон чиглэлд гарлаа. 

  Аяны нээлтэд Засаг даргын орлогч А.Түвшинжаргал,  Мал эмнэлгийн газрын дарга П.Эрдэнэжаргал болон сумдын Засаг дарга нар,  Орхон аймагт үйл ажиллагаа явуулж буй хувийн хэвшлийн   Мал эмнэлгийн газрын ажилтан албан хаагчид оролцож, 24500 тун вакцин, малын эмч нарт нэн хэрэгцээтэй байсан таблет зэргийг гардуулав.  Засаг даргын орлогч А.Түвшинжаргал “Сарын аяны хүрээнд өрнөж буй вакцинжуулалтын ажилтай холбоотой аймгийн Засаг даргын захирамж гарсан. Үүгээр шаардлагатай зардлыг шийдэж, долоон чиглэлд мал амьтны гоц халдварт шүлхий өвчнөөс урьдчилан сэргийлэх вакцинжуулалтын ажил өнөөдрөөс эхэлж байна.   “Цахим-Эрдэнэт хөтөлбөрийн хүрээнд Мал эмнэлгийн газруудыг цахимжуулах зорилт тавьсан.  Үүний дагуу Орхон аймагт үйл ажиллагаа явуулж байгаа долоон Мал эмнэлгийн газруудад шаардлагатай байсан таблетуудыг  шийдэж өглөө. Ингэснээр  Мал эмнэлгүүд малын шилжилт хөдөлгөөн цаашлаад малын түүхий эд зарах гэх мэт асуудлаар хоорондоо мэдээлэл солилцох боломжтой болж байгаа юм. Аймгийн иргэдийн хүнсний аюулгүй байдлыг хангахад томоохон дэмжлэг болно. Гол нь мал эмнэлгүүд бүрэн дүүрэн ашиглаж, үр дүнгээ гаргах ёстой” гэлээ. 

 Орхон аймаг малын тоогоороо бусад аймгуудаас харьцангуй бага ч малын чанарыг сайжруулж, иргэдээ мал,амьтны гаралтай эрүүл хүнсээр хангахад ихээхэн анхаарч буй. Уг ажлын нэгээхэн чухал хэсэг нь  Мал эмнэлгүүдийг цахимжуулах байсан юм. Тэгвэл Орхон аймагт үйл ажиллагаа явуулж буй хувийн хэвшлийн долоон мал эмнэлэг таблетаар хангагдсанаар малчны хотноос мал эмнэлгийн нэгдсэн системд холбогдож, шаардлагатай бүхий л  бүртгэл мэдээллийг газар дээрээс нь хийх боломж бүрдсэнд  мал эмнэлгийн эмч, мэргэжилтнүүд талархаж буйгаа илэрхийллээ. Мал эмнэлгийн  эмч, мэргэжилтнүүдийг таблетаар хангах уг асуудлыг 2021 оны арванхоёрдугаар сарын 7-ны өдрийн аймгийн ИТХ-ын хуралдаанаар хэлэлцэж, шаардлагатай төсвийг нь 2022 оны төсөвт суулгаснаар ийн шийдвэрлэгдлээ.