Энэ он гарсаар 163 иргэнийг байнгын болон түр ажлын байранд зуучилжээ

Хөдөлмөр халамжийн үйлчилгээний газраас энэ оны  I улирлын  мэдээллийн талаар хэвлэлийн бага хурал хийлээ. 2021 онд Орхон аймгийн хүн ам 106 гаруй  байгаагаас ажиллагсад  30643, ажиллах хүчин 37348, ажилгүй 6705 иргэн  бүртгэгджээ.   Энэ оны нэгдүгээр улирлын байдлаар бүртгэлтэй ажилгүй 1850 иргэн байгаагийн 44.9 хувь нь эрэгтэй, 55.1 хувь нь эмэгтэй байна.

   Өнгөрсөн оны нэгдүгээр улиралд бүртгэлтэй ажилгүй 1640 хөгжлийн бэрхшээлтэй иргэн  байсан бол энэ онд 40-өөр нэмэгдэж 1850 болжээ.  Тус газарт энэ нэгдүгээр улиралд 195 ажлын байрны захиалга ирсэн нь өнгөрсөн оныхоос 27 хувийн өсөлттэй байна.  Ажлын байрны захиалгыг ажил мэргэжлийн ангиллаар нь авч үзэхэд худалдаа үйлчилгээний ажилтан 30, мэргэжилтэн 107, техникч болон туслах мэргэжилтэн 19 гэх  мэт ирж, 163 иргэнийг байнгын, түр ажлын байранд 9, улирлын чанартай 2 иргэнийг ажилд зуучилсан байна.

Харин энэ он гарсаар 187 иргэн шинэ ажлын байранд оржээ. Үүнийг өмчийн хэлбэрээр нь ангилж үзвэл төсөвт байгууллагад 42, хязгаарлагдмал хариуцлагатай компанид 98, хувийн аж ахуйн нэгжид 47 иргэн орж ажлын байраар хангагджээ.

  Аймаг орон нутгийн зүгээс  залуучуудын хөдөлмөр эрхлэлтэд онцгойлон анхаарсаар ирсний нэг нь өнгөрсөн жил  хэрэгжүүлсэн "Залуучуудын хөдөлмөр эрхлэлт, гарааны бизнесийг дэмжих хөтөлбөр" юм. Уг хөтөлбөр хэрэгжсэнээр өөрийгөө танин мэдэх, үнэлэх, хөдөлмөрийн зах зээлд нэвтрэн орох, ажил хайх чадвар эзэмших, ажил хайх, гарааны бизнес эхлэх үе шат бүхий сургалтад 14 залуусын бүлэг хамрагджээ. Мөн  гарааны бизнес санааг баяжуулах, өрсөлдүүлэх бүлгээр ажиллаж ирээдүйтэй санааг хөгжүүлэх хурдасгуур арга хэмжээнд 5 залуучуудын бүлэг хамрагдсан байна.

  Мөн өнгөрсөн онд Щвейцарын хөгжлийн агентлагийн санхүүжилтээр Германы “GFA” компанийн хэрэгжүүлж буй Залуучуудын хөдөлмөр эрхлэлтийг дэмжих төслийн хүрээнд Интерншип туршилтын хөтөлбөрийг хэрэгжүүлсэн. Энэ жил залуучуудын хөдөлмөр эрхлэлтийн үйлчилгээний загвар төв нь 15-34 насны ажил хайгч залуучууд болон 25 багийн Хүнсний эрхийн бичгийн үйлчилгээнд хамрагддаг 50 залуучууд, 15 Хөгжлийн бэрхшээлтэй залуучуудыг чадавхжуулна.

Ажил хайгчийн болон ажлын байрны захиалгыг цахимжуулсан бөгөөд Орхон аймгийн ХХҮГ пэйж хуудсаар цахим линкээр  бүртгэлийг зохион байгуулж байна.